Uudhano woongonyo poKonyoka Guest Hotel wa enda nawa

0
81

Shipi Elago na Johannes Wilibard

ONGWEDIVA-Oshinyanga shoKonyoka Guest House osha li shu udha noonkondo Olyomakaya ga yi sho aantu oyendji ya li ya ka tala uudhano woongonyo pehala ndyoka.

Uudhano owa li wa longekidhwa koshiputudhilo hashi dheula aadhengingonyo sha Kilimanjaro Boxing mOshakati.
Aatali mboka ya li ya holoka puudhano mbuka oya li ya nyanyudhwa komalugodhi 12 ga li pokati kaaBokisi ya za miiputudhilo shaKilimanjaro, Ondangwa Boxing Academy, nosho wo Oshakati Boxing Club.

Uudhano wotango owa li pokati ka Nestor Lewis na Toretto Orlando moka Nestor a li uulukile Orlando komutse gwoondjamba, konima yomadhingoloko gatatu, moshiviha sho 40-43 kg. Moshiviha sho 46-49 kg Trofimus Johannes okwa dhengemo Nepilu Abed muudhano mboka wa li wa thigi oyendji yagwa kiipundi oshoka aamati oya li ta ya dhenge dhaKahandja tadhi pukululwa pomeho.

Moshiviha sho Bantam shoka hashi dhanwa kaamati mboka ye na ondjundo yithike po 52-55 kg osha li sha sindanwa po kuFabianus Stefanus gwaKilimanjaro Boxing ngoka a li a dhenge mo David Johannes gwOndangwa Boxing Academy, omanga Immanuel Johannes a li a dhengwa mo kuJohannes Kondjeni, molugodhi ndoka lwa li lwa goyoko koshiviha shaamati aashona.

Omaudhano gaamati aanene sho ga holokele mokapale, oshinyanga sha Konyoka Guest Hotel osha li sha kuutumba koongenge dhiipundi oshoka mpeya ka opwali omuntu ta dhengwa nonyanya. Kleopas Junias oye a li a ningi oshiholelwa shotango moka a li a dhengwa na yi ku Hafeni Hofni gwaKilimanjaro, omanga Shangilifa Matias a kanitha uudhano molwashoka okwa li a mono oshiponga momutse konima sho ye nomukondjithi gwe Erastus Jonas ya li yi idhenge omitse mumwe, naashika osha li sha thiminike omuhikihiya opo a hulithepo uudhano na Matias okwa li a dhengwa mo naashoka ha shi takumwa (TKO) Technical Knock Out.

Nghinanamunhu Michael okwa li a toola iitsa konima sho omukondjithi gwe Aileka Paulus iiyehameke pethimbo lyomaidheulo.
Titus David okwa li a dhengemo Jackson Prince ye Johannes Molosande ta dhenge mo Festus Nangolo. Antonio Wamungandjo ta lathwa uupuka ku Linus Nyati, omanga Namboga Andreas a li a pewa nambwa ku Moombola Nghishimwene.

Uudhano uunene wongulohi owa li pokati ka Immanuel Jason na Steven Paulus moka omalume ngaka ga li shili taga imokagula, nuudhano mbuka owa li uunene, naagandji yiitsa oya li ya mono kutya owa dhanwa shi thike pamwe, ano kapuna ngoka a sindi mukwawo.
Mwene gwoongesefa yoKonyoka Guest Hotel Johannes Wilibard a tseyika nawa Ndilimani okwa li a kumike aagundjuka opo ya kutheko iitalenti yawo nohamu oshoka ngele ita ye shi ningi nena ka puna ngoka te ke shi ninga.

Okwa ti okwa nyanyukwa okutula oshimaliwa momaudhano oshoka ngele aanona oya mono eyambidhidho otaya vulu okwiitunga po noku ninga omanyakwa gaNamibia.

Uudhano mbuka owa li wa kwashilipalekwa nokapandi ko N$ 12 000, okuzilila koKonyoka Guest Hotel na owa li wa unganekwa kuKilimanjaro Boxing.

LEAVE A REPLY

Please enter your comment!
Please enter your name here