Aapambele ya nakusa Kamati kaya uvitile ompangu ombili

0
1131

Maria Namupala

ONDJOKWE-Aapambele ya nakusa Rauha Kamati gomimvo 23 kaya uvitile ompangu nepangelo ombili. Oya yelitha kutya omwana gwawo okwali a dhipagwa ku kuume ke kopaihole pehulilo lya Juli nuumvo, nomufekelwa okwali a mangwapo.

Otaku hokololwa Kamati a dhengwa nomuhi ku kuume ke nokwa hulitha esiku olyo tuu ndyoka, opolisi oyali ya tula omufekelwa ngoka Fillipus Uusiku miipandeko nokwa kala ta holoka mompangu.

Oshiwike sha ziko sho ali a holoka oshikando oshititatu mompangu yamengestrata, omupanguli Peter Nangula okwali a yelitha kutya omufekelwa ngoka okwa pewa ompito yokwiifutilamo noshimaliwa shooN$ 600.00. shoka she eta aapambele ya nakusa ya geye noonkondo nokulya moonyandi.

Nangula okwa yelitha kutya omatompelo ngoka ga petha omufekelwa obooloha omolwaashoka epeko lye lyoshipotha kali wetike, notali tegelele li talike ngele ta li monika. Ta ti omufekelwa okuna uuthemba wokukala a pewa obooloha uuna a gandja omatompelo gu uvitikeko.

Aakwanezimo mokuuva kutya omufekelwa ngoka a dhipaga okamwana kawo okwa pewa obooloha yoshimaliwa shi thike mpoka, oyali ya tokola okuya kompangu oshiwike sha ziko nokukapula kutya oshazi peni opo omufekelwa ngoka a pewe ompito yokwiifutilamo nonande pwa piti owala oomwedhi mbali konima yoshiningwanima.

Oyali ya gongala pompangu taya popi nokuholola omakemo gawo, oyati omolwashike omufekelwa ngoka e na okumangululwa mo, yo nongele epeko lye kali wetike oshike itaa vulu a kale mondjedhililo sigo epeko ndyoka tali monika.

“Out uvite oluhodhi molwa oshiningwanima shoka sha ningwa po, notashi ehameke epangelo pamwe nompangu tayi mangulula omulongi gwiimbuluma yi thike mpoka, ye omumwetu opo ashike a fumvikwa no inapu pita ethimbo ele konima yoshiningwanima oshikumithi,” Taya popi ngaaka. Taya hokolola kutya omitima dhawo odha nika uupongo noluhodhi unene pethimbo ndika, oyati shoka shi yu uvitithe oluhodhi unene omolwaashoka oshiningwanima oshitalala, notashi yemateke omuntu ta mangululwa a dhipaga, noya hala oompango nooveta dhoshilongo dhi talwe nawa, opo mboka taya dhipaga ya pewe omageelo, lyo epangelo li tale oombinga adhihe.

“Otuna woo uumbanda kutya omufekelwa ngoka ngele okwa mangululwa, ohashi vulika a ka longe natango iimbuluma yafa mpoka, molwaashoka esiku ndyoka okwali woo a dhenga yina ya nakusa omanga inaaka dhenga nakusa nomuhi, okwa kala ha kala maandjawo ya nakusa, nokonima yoshiningwanima okwa yi kaandjawo, onkene otatu pula epangelo li ndjekeko kooveta dhalyo,” taya popi ngaaka.

Esiku ndyoka omufekelwa a pewa obooloha okwa kunkililwa kaa endeko komukunda hoka, ye kaa ninge omakwatathano naapambele ya nakusa Kamati. Otaku hokololwa omufekelwa a zi kuundunda womanwino aadha kuume ke kopaihole ta longekidha uulalelo nokwali emu pula a longithe ongodhi ye yopeke, oya tameke ihe oondjuma ndhoka dhe eta omufekelwa a kuthe omuhi nokudhenga Kamati, ngoka a falwa mbala kokapangelo kOkatope ashike okwa hulithile mondjila okuya hoka.

Mbaka yaali oya kala pamwe uule woomvula ntano noyena okanona kena oomvula mbali ngaashingeyi. Otaku hokololwa ya kala olundji haya nyenyeta ashike inashi kala hashi lopotwa kopolosi.

Omufekelwa ngoka ina za mo natango mondholongo, ashike uuna oshimaliwa shobooloha shoka a pewa sha futwa ota kala a mangululwa ethimbo kehe.

LEAVE A REPLY

Please enter your comment!
Please enter your name here