Chief Inspector Hamupolo aya mopenzela

0
204

Tuulikki Abraham

Lüderitz-Ou ali omukulunhu wopolifi mo Lüderitz, Chief Inspector Paulus Mandume Hamupolo okwa ningilwa oshivilo shelekelo eshi a wanifa eedula 60, nokwafika meedula dokuya moshipundi shetulumuko. Hamupolo okwa longa moshikondo shopolifi oule weedula 27. Oshivilo oshaliko mehuliloshivike laya sha ningilwa mosaala yomendiki loLüderitz Correctional Service, omo ovanailonga pamwe naye, novashivwa okudilila koikondo ya yooloka modoolpa vali vaongala nokutyapula pamwe.

Mondjokonona yaye oyo ya leshwa kuDetective Inspector Engelhardt Aoxamub , ota kuhokololwa Hamupolo adalwa momafiku 18 October 1957 momukunda Endola mOshitukulwa Ohangwena.

Oprimafikola okweifikola pEndola, nokwa ka twikila kofikola yopombada kOngwediva modula 1977. Modula 1980 okwafiyapo oshilongo nokwa ka waimina etanga loPLAN moAngola. Hamupolo okwaalukila moshilongo pamwe novakondjelimanguluko vakwao modula 1989. Modula 1990 okwa kutwa metanga lopolifi nombadi youKonstable nokwatumwa aka longele ko Lüderitz.

Modula 2011 okwa tumwa komadeulo e na sha nuustation Commanda, nokonima yamadeulo okwa ulikwa a ninge Kommanda mopolifi mo Lüderitz. Modula 2015, oshitaasi yopolifi moLüderitz oya tulwa pombanda okudja poclass B nokuya po class A, na Hamupolo okwa pewa onghatu yoChief Inspector, opoosa oyo a kala muyo fiyo osheshi a hanga oshipundi shetulumuko. Omukulunhu wopolifi moshitopolwa sha //Karas Rudorf Isaak okwa hokolola Hamupolo kutya okwa longa efimbo lile me tanga lopolifi, nokwalikola ounongo uhapu, oo a kala ta longifa mokuyambula po osasiona yopolifi moLüderitz.

Isaak, okwa pandula Kaarin Hamupolo, eshi a kala nokufila oshisho omuholike waye, oule weedula adishe odo, eli moilonga, nokwa indila meeHamupolo a twikile noku tekula omuholike waye, pefimbo olo eli moshipundi shetulumuko. Isaak okwa halela Hamupolo, oukolele mokukalamwenyo kwaye.

Ovapopi ovo vali vamona omhito yokupopya poshivilo shokuya moshipundi shetulumuko sha Chief Inspector Hamupolo, ovemu halela oukolele, moishihupe shokukalamwenyo kwaye. Tava tumbula kutya, nonande a ya moshipundi shetulumuko, osho otashi ulike ashike kutya, okwa mangululwa moilonga yomombelewa, ashike, otava kala nokukonghola pomivelo deumbo laye nokukonga omayele taa pumbiwa.
Moshipopiwa shaye Hamupolo okwa pandula Tate Kalunga eshi a kala pamwe naye, nokwe mu pa oukolele, moilonga youpolifi oyo a longa oule weedula 27. Okwa pandula yoo eshi oshikondo shoPolifi, okudja tuu keembelewa dakula, ndele fiyo okeembelewa dopashitopolwa eshi , vemu tumbaleka, omolwa oilonga oyo a longa metanga lopolifi ya Namibia.

Hamupolo okwa pandula ovakalimo vomo Lüderitz eshi va longela kumwe, osho a tumbula kutya, melongelo kumwe novakwashiwana, opolifi oya dula okulonga oilonga yayo noupu, nokukandeka oimbuluma modoolopa.

Okwatwa omukumo ovanailonga pamwe naye, va longe noudiinini, nonelitulemo, opo vadule okulonga oilonga yavo fiyo otavai moshipundi shetulumuko ngaashi yee.

LEAVE A REPLY

Please enter your comment!
Please enter your name here