Esiku lyiikulya muuyuni

0
37

Omutoolinkundana

Omupapa Francis okwa indile omapangelo muuyuni ga longele kumwe noku ninga omatembu gaantu ge na egameno go ishewe ga kale ehogololo lyomuntu mwene.

Okwa tsikile ko ati opo egameno lyiikulya li kwashilipalekwe komuntu kehe osha pumbiwa okupalamena elunduluko monkalo yombepo osho wo okuhulitha po omaipumomumwe muuyuni.

Omupapa Francis okwa ningi eindilo ndika pethimbo lyedhimbuluko lyesiku lyoondya muuyuni lya ningilwa poombelewa oonene dhehangano lyIigwana Hangano lyiikulya nUunamapya[FAO] moRome oshiwike shika.

Otema yesiku ndika nuumvo oya tala koshinima shoku kondjitha omatembu, okupitila mokupungula megameno lyiikulya nehumithokomeho lyokomikunda.

Esiku lyiikulya Muuyuni olya dhimbulukiwa nuumvo mokati kenenepalo lyondjala oshikando shotango, ndjoka ya guma aantu konyala oomilliona 815 muuyuni.

Mbaka oya kalelapo konyala ooperesenda 11 dhaakuuyuni. Eyopombanda lyaasindjala olya hwamekwa kenenepalo lyomaipumomumwe niita osho wo omalunduluko ga etwa komainyengo ge na sha nelunduluko monkalo yombepo, mbika oyo tayi thiminike aakuyuni ya thige po omavi gooyina noku ka konga uuhupilo nokumwenya okuhwepo palwe.

Omuperesidente gwa Madagascar Hery Martial Rakotoarimanana Rajaonarimampianina, ngoka oshilongo she shi na omashongo ga etwa kelunduluko monkalo yombepo okwa popitha wo oshigongi shoka.

Aakuthimbinga yalwe poshiithanene mpoka oyo Komufala gUunamapya gUukumwe waEuropa neyokomeho lyokomikunda Phil Hogan, omuperesidente gwa International Fund for Agricultural Development (IFAD) Gilbert F. Houngbo nomuwilikipitithi gwehangano lyiikulya muuyuni World Food Programme (WFP) David Beasley.

Oominista dhuunamapya miilongo iheyali nenge (G7) nadho odha li pedhimbuluko ndika.

LEAVE A REPLY

Please enter your comment!
Please enter your name here