Moshitila Mwa Z’Ondjupa: Omaukwatya gomakwatathano gaanangeshefa

0
49

Moshinima shiiyenditho, ongame owala nda kala nda fa nda thethelekwa mokwaaha landa oshihauto, oshoka onda li ndi na iimaliwa oyindji ya gwana okulanda oshihauto, ihe kanda li ndi shi okuhinga. Onda li wo ndi na ombepo ndjoka kutya, omuntu oto landa ohauto, e ta yi kandoma po nenge yi teke. Omuntu owa kala owala wu na omamaliwa ogendji otututu, ngoye itoo landa oshihauto. Sho nda ka tokola ndi lande oshihauto shandje shotango, uupyakadhi wopashienditho nowa kanduka po pungame tuu sheke.

Oveta yokatongotongo yonale oya li hayi gandja uuthemba kutya pokati kositola nositola napu kale ookilometa dhi thike peni, okuya kositola onkwawo. Shoka osha hala okutya, pokati kongeshefa nongeshefa opuna okukala ookilometa dhontumba nenge dhongandi , opo mu paathane ompito yaalandi. Pethimbo limwe osha li oshiwanawa, nosha li wo ngaa she tu kwatha.

Omuntu ngele oku li popepi nangoye, nena opo ngaa e na okulanda positola yoye mpoka, oshoka otashi vulika a kale a nyengwa ngaa nokiimaliwa mbi ta futu oshihauto a ka tale iinima. Iihauto sho ya ka ninga oindji, oshinima sha ka enda ngaa hewa nawa.
Omunashihauto ngele owa thigi po omuntu to mu pula ooranda ntano, ko taku zi mukweni te mu pula ooranda mbali, opuwo okwa ya tuu ngaaka.

Ngele owe mu lombwele kutya owu na ko oshako yosuuka, otamu ikundu ngaa kutya oto mu futitha ingapi.
Oshinima ndi itaala kutya osho sha li sha hili aalandi kongeshefa yandje pethimbo ndiyaka lyopetameko lela , osho shika kutya, kakwa li naanaa kuna oositola odhindji, naandhoka dha li po odha li tadhi yalulwa. Pethimbo ndiyaka okwa li owala ku na ositlola yimwe kOndangwa haku tiwa, Ondjndjo nonkwawo ya li kEndola haku tiwa, Endola Store, nonkwawo ya li kOmafo haku tiwa Omafo Store, nayimwe ya li kOmbalantu, ya li hayi ithanwa Ombalantu store. Oositola ndhoka ne odho dha li hadhi landitha iinima kaanangeshefa kondando yopevi, ano yopaholosaila.

Ashike nando ongawo, ngame kombinga yandje , oositola ndhoka odha li dhi li kokule nopehala mpoka nda li. Ngame onda mono owino waampoka tandi vulu okumona iinima mbyoka ya halika kaantu kutya otandi yi adha peni. Iilandithomwa mbyoka ya li ya halika kookastoma dhandje, onda kala handi ke yi landa kOoholosaila dhomUushimba, nosha pendja, ompito, opo ndi vule okulanditha koondando dhi li hwepo.

Aalandi yandje oya li haye shi popi kutya oondando dhandje odha li dhi li pevi dhi vule dha yakwetu.
Onkalo ya tya ngaaka , oya kala nokuhila aaantu okuziilila koombinga noombinga ye ye, ya lande kongeshefa yandje. Eyambidhidho okuziilila kaalandi olyo lya kwathele ndje ndi tunge nokuyambukapo muule wethimbo efupi. Shika osha koleke eitaalo lyandje kutya, omwenyo gwongeshefa, aalandi. Shampa wu na aalandi, nena ongeshefa yoye otayi humu nawa komeho mbala.
Etameko lyelyenge lyoongeshefa dhandje

Okuza kOkatana, onda tembukile kOshakati komatungo nga ga li ga tungwa mo kehangano hali ithanwa Bantu Beleggings Korporasie van Suid Afrika Beperk[BBK], nenge Bantu Investment Corporation of South Africa Ltd. Ehangano ndyoka olya totwa mOveta yOnomola 34 yomumvo 1959. Momatungo ngoka omo nduno nda li nda mono ositola ndjoka haku tiwa, o-BBK, nomo nda kala handi longele uule womimvo dhi li 38 lwaampoka. Konima yomimvo mbali sho nda tameke okungeshefela momatungo ga-BBK, opo nduno ishewe nda tameke oContinental No 1, ndjoka ya tseyika nawa nedhina ,Okonde No 1, nde yi tameke ngaa nuupeleki wowala nuunima uushonashona. Aalandi yandje oya kala haa papata ndje nawa, ngame tandi ya yakula wo nawa. Tango tango oya yambidhidha ndje pOkatana, nopositola ya-BBK mOlukanda lwaShakati, nopOkonde No.1.Oositola adhihe ndhoka ndatu odha li tadhi longele oshita. Okutunga Okonde No.1 osha li owala okwiindjipaleka oongeshefa dhandje, ano okuya kondje yondoolopa okukonga ehala lya andjuka nawa oshoka pethimbo ndiyaka lyomimvo 1965 na 1966, kakwa li haku landwa omahala , onkene onda yi pondje yondoolopa, opo ndi mone ehala lya andjuka nawa mpa nda ka tunga Okonde No.1. Onda yi nduno komalenga, omalenga e taga pe ndje ehala enene, ngashi tali monika natango. Mpoka opo nduno pwa tamekela elyenge lyoongeshefa dhandje ngashi to ke dhi lesha meudhililo membo muka montopolwa onti -12.

LEAVE A REPLY

Please enter your comment!
Please enter your name here