Omalongekidho guudhano waFacebook ogeli metifa

0
54

Maria Namupala

ONDANGWA-Omumvo kehe aalongekidhi yomaudhano moshilongo ohaya longekidha uudhano wowina mboka hawu ithanwa Facebook tournament. Uudhano mbuka owa totwapo nelalakano okuhanganitha aagundjuka naaholi yomaudhano yaza kiitopolwa niitopolwa yoshilongo.

Uudhano mbuka nuumvo owa thanekwa wu kaleko pehulilo lyomwedhi nguka, tawu dhanenwa pokapale komaudhano kosekundoskola yaAndimba mOluno. Gumwe gomaaunganeki yuudhano mbuka Sammy Mushelenga okwa ti mbuka, owa tala unene ombinga, ketanga lyokoompadhi, Volley Ball osho wo etanga lyomokambamba. Mushelenga oku na omukumo kutya aaholi yuudhano ya za koombinga noombinga otaya kala ya holoka noku tala nkene oospana tadhi kondjithathana, nonkene ootaliwashele taya nuka mombanda ngaashi ye shi ilongela, yo taya nyanyukilwa woo pamwe.
“Uudhano mbuka ohawu kalako omumvo kehe mono aaholi wawo haya hangana.

Tse, shika ohatu shi ningi nelalakano lyoku hanganitha aagundjuka yaza kiitopolwa, nomukalo woo gulwe gokunyanyukilwa pamwe nayakwetu, otwa hala woo opo tu yambule po omaudhano miitopolwa yetu yaWambo nale, nuudhano mbuno otwa tokola kaawu se po ihe wu kale po sigo tawu adhika komapipi ta geya,” Mushelenga ta uvaneke.

Okwa ti shika oshikando oshitiheyali uudhano mbuka tawu dhanwa, naaluhe ohawu dhanenwa owala pokapale hoka kaAndimba, ohamu kuthwa woo ombinga koosipana dhoonakulwa aakulu ngele tashiya komaudhano, unene ketanga lyokoompadhi.

Okwa ti pethimbo ndika oosipana odhi ipyakidhila nokwi ishangitha opo sho ando ehulilo lyomwedhi nguka ta li thiki nena, okudhana owala ku li po. Ta ti olundji moshigwana ihamu kala omaudhano naagundjuka oyendji ohaya kala owala pomahala gomanwino nokulonga iimbuluma, okwa gwedha po kutya omaudhano ohaga kwathele okukutha po ezaza nokuhanganitha aagundjuka ya za koombinga noombinga, yo taya nyanyukilwa ishewe pamwe.

Aasindani otaya ka pewa omasindano ogendji noga yooloka, no taku indilwa oosipana ndhoka dhali dha sindana omakopi omumvo gwayi dhi kale dhe ga thikitha mbala, go ga longekidhilwe aasindani aape mboka taya ka dhenga mo oosipana adhihe.

Okwa holola kutya omaudhano miitopolwa yokonooli yoshilongo oga fa ga thenyenwa kongudhi, naaluhe ota ga ende ta ga shongola, “Okwa konekwa oyendji yomaagundjuka inaa ya hala ya kuthe ombinga, otuna ehalo enene opo tu uvitheko aagundjuka momidhingoloko ya kale haya kutha ombinga miinyangadhalwa ya pamba omaudhano yo yi ikaleke kokule niinima ya puka, shino otashi ya kwathele woo opo ya kale yena omalutu ga kola no gena oonkondo,” Mushelenga ta ti ngaaka.

Okwa ti uudhano wawo owa kwashilipalekwa komunangeshefa noku li omukwatakanithi goSWAPO mOshikoto Armas Amukwiyu, nokwa holola kutya oye a kala omukwashilipaleki omunene guudhano mbuka woFacebook omumvo kehe.

Otaku indilwa kehe ngoka wa pumbwa uuyelele wiihwapo wu kale wa dhengela koongodhi ndhika, ngoye to pula shoka wa hala oku uva 0818803333, 0812779897 nenge 0813599999. Ta ti aaholi yuudhano ayehe oya tegelelwa ye ye ya tale omanyakwa.

LEAVE A REPLY

Please enter your comment!
Please enter your name here