Omukondjelimanguluko gumwe a pewa egumbo mOmusati

0
225

ONDATSILA

Omukondjeli manguluko ngoka a lemana momumvo 1989 sho a ponokelwa komutondi omanga a li ta ningi iikonga yoku uvitha ko aantu kombinga yongundu yoSwapo ngashingeyi ota lala ta kotha nawa sho a tungilwa egumbo lyopashinanena kepangelo.

Simeon Amutenya oye omukondjeli manguluko a za komukunda gwedhina Ondatsila moshikandjohogololo shaTsandi moshitopolwa shaMusati.
Egumbo olya gandjwa kooyene metiyali lyoshiwike shika ihe olya pu okutunga oomweedhi ndatu dha piti.
Ngashingeyi Amutenya ota yolele ketayego sho a pewa etungilo lya aluhe ndyoka li na oondunda mbali dhokulala, ondunda yokukuutumba nosho wo okombitha nondunda yokwiiyogela.

Mbaka oya pewa wo omeya nolusheno lwoketango ndoka lwa tulwa moondunda adhihe.
Ashike omupevi minista moshikondo shoonakulwa aakulu Hilma Nikanor ngoka oye a gandja oshipatululo shegumbo ndyoka kumwene gwalyo okwa ti shika osho endhindhiliko lyepandulo oku zilila kepangelo sho aaNamibia ya tokola okukondjela emanguluko lyoshilongo shawo.
Okwati ndika olyo egumbo etihamano lya tungwa moshitopolwa shika lya tungilwa oonakulu aakulu mboka yali ya li yi hupula opo ya sile emanguluko lyoshilongo.

Nikanor okwa ti moshilongo ashihe omagumbo ngoka ga tungwa ngashingeyi ogo 293 .
Okwa ti muule womumvo gwoshimaliwa sho2016/17 oshikondo shika osha tunga omagumbo 65 moshilongo ashihe.
Omagumbo agehe ngaka oga pula epangelo oshimaliwa shi vulithe poomiliona dhili N$173.
Ominista oya ti opolohalama ndjika otayi tsikile opo mboka ye yinuninwa ya gwanithilwe po shoka ya nuninwa ongo olupandu ihe kashishi ofuto yaashoka ya longa.

“Omagumbo ngaka oha ga tungwa gena omeya nolusheno unene ngoka geli popepi nomalusheno. Ihe omeya ngoka otaga futwa kooyene yomagumbo ngoka ya longitha nosho wo omalusheno ngoka,” osho a yeleke ngaaka.

Okwa tsikileko a ti mboka ya kala noku kondjela yapewe uuwanawa mboka tawu pewa aakondjeli manguluko ihe ina ye wi ilongela kayena esiku ya makele uuwanawa mbuka oshoka yo oyali taya kondjitha emanguluko.

Okwati ashike opuna aapambele yaakondjeli manguluko yamwe mboka taya kutha ko omagumbo ngaka kooyene yagwo etaa etitha engundumano megumbo moka shoka inaa shi pitikwa.

Okwa ti kutya omikalo ndhoka nadhi mone ehulilo oshoka itadhi kwathele nande epangelo oku adha shoka lya lalakanena moku kwathela aantu mbaka.

Onkee minista okwa indile nesimaneko enene koshigwana opo shi simaneke aakondjeli manguluko nosho wo okuya kwathela opo ya kale moonkalo ndhoka ya nuninwa kepangelo oshoka onkalo oyo tuu ndjoka oye yi ilongela ngaashi tashi vulika.
Mwene gwegumbo ndyoka ngoka ena uulema mokugulu koko kumoho okwa hokolola kutya ye ke na iitya nomatumbulo oku tambula ko shoka a longelwa kepangelo onkee okwa ti tangi tangi shoka sha za komutima gwe.

Oshituthi oshali sha kalwa kaanamukunda nosho wo komalenga ngoka geya okuninga oombangi yaa shoka sha longwa kepangelo.
Kansela gwoshikandjohogololo osho tuu shoka Junias Amunkete okwa ti okwa nyanyukwa sho egumbo lya longwa nawa noonkondo na okwa hala aatungi ya kutheko oshiholelwa kwaamboka ya tunga egumbo ndyoka.

LEAVE A REPLY

Please enter your comment!
Please enter your name here