Oshana naZambezi nava fimanekelwe oilonga iwa

0
42

Ehokololo olo tali holola kutya Oshitukulwa shaShana noshaZambezi oya hanga omuvalufaneko wayo mOshikonga shekengho lovalumenhu otau hafifa neenghono, nota u ulike nghene oshiwana sheli longekida oku longela kumwe nepangelo mokulwifa ombuto yoHIV noku ya momilele da amenwa.

Pamushangwa wa dja kouministeli wouhaku nookahewa kouministeli moiling, oo wa li wa yandjwa oshivike shadja ko pefimbo lomutumba oo wa li moWindhoek una sha nekengho lovalumenhu, ota u ulike kutya, opologalama oyo ya kwatelwa komesho kehangano lo I-Tech Namibia olo lili koshi yOuministeli wOuhaku moitukulwa ei ivali oyali ya tengenekelwa okukengha ovalumenhu 3500 moZambezi, novalumenhu 4500 moshitukulwa shaShana. Eshi osha ningwa pokati komudo woshimaliwa oo hau tameke mefiku 1 Kotoba 2016 fiyo omo 30 Sepeteba 2017. Ota ku hokololwa omutengenekwa mwaalu ou wa hangwa, ngaashi naanaa sha li sha dilaadilwa.

Oshidjemo shiwa shopologalama ei otaku hokololwa sha etifwa kelongelokumwe liwa pokati kouministeli welongo nowouhaku, nelalakano okutala kopologalama yoNational School Health Programme nokoshilongwa shoLife skills osho hashi hongwa ovanafikola aveshe, meefikola adishe moshilongo.

Shikwao vali osho sha eta opo opologalama ei i ende nawa osho okuxwaxwameka nelitulomo opo ku fiwe oshisho kutya ovalumenhu ovanyasha ova ya keenhele oko taku ningilwa oikonga yekengho.

Oshidjemo eshi oshishii okupandulilwa ouministeli eshi kwa pondolwa okuudifa ko oshiwana koitukulwa yokonooli yoshilongo oko ekengho lovalumenhu la kala la tali ka ko onga oshidila, no kali li pamufyuululwakalo.

Hano, eudeko pambambo netaleko lihe li mondjila omo oshiwana sha li sha tala ko ekengho lovalumenhu otali ende tali lunduluka, noshitya smart cut (eteto loufuuli) paife oshi li momwoode nota shi dana onghandangala mokati kovalumenhu ovanyasha.

Naashi otashi pandulwa shaashi ngeenge otaku talika omivalu dovanhu ovo va kwatwa kombuto yoHIV/AIDS moNamibia otadi ulike kutya onooli yoshilongo, unene tuu oshitukulwa shaZambezi oyo ili pombada, ile i na ovanhu vahapu ovo va kwatwa kombuto yoHIV. Omuvalu ou ota u yelekanifwa noitukulwa ikwao moshilongo ngaashi shaHardap, Otjozondjupa omo muyadi ovanhu vomihoko dimwe moshilongo ngaashi ovapopi vOtjiherero hava kenghwa pamufyuululwakalo wavo.

Hano onga oshiwana, otu na oku tala nokuyelekanifa opo omauwa taa etwa kexumokomesho ile kekwatelopo loukolele womunhu ena ondjudo edulife omifyuululwakalo detu. Nopeemhito opo omauwa ekalekopo loundjolowele taa ulike kutya oo okuna omungudo, omifyuulululwakalo donhumba otwa pumbwa oku di efa fye tu kale ke po oundjolowele woshiwana nowetu vene.

Ngaashi konooli yoshilongo otu na oku didilika kutya onooli oyo oshitukulwa shi yadi ovanhu shi dule okuyelekanifaa noitukulwa ikwao moshilongo.

Omuvalufaneko mupe oo wa tulilwa po oshitukulwa shaZambezi oo ovalumenhu 3695 na veli 5000 ova fanekwa opo va kenghwe moshitukulwa shaShana. Opologalama ei yekengho lovalumenhu, ili koshi youministeli wouhaku, mOshana nomoZambezi ya shivika nedina Voluntary Medical Male Circumcision (VMMC) oili po mekwafelo lepangelo laUnited States okupitila moshikefa shoPresident’s Emergency Plan for AIDS Relief (PEPFAR) nokoInternational Training & Education Center for Health (I-TECH).

Ashike eshi nee oshikonga eshi tashi longo notashii komesho ina shi pumbwa ashike shi kale sha twa ashike omutwe moitukulwa oyo ya tali ka ko iya di ovanhu va kwatwa kombuto omanga hatu efa ikwao ei i na ovanhu vanini ve na ombuto. Ngaashi naanaa haku tiwa ohandje imwe oya xwika ofuka, etatandavelo loHIV monhele keshe moNamibia ola pumbwa okukeelelwa opo i kombwe mo moshilongo na ohatu kala tu na Namibia la manguluka nokombuto yoHIV/AIDS.

LEAVE A REPLY

Please enter your comment!
Please enter your name here