Oshigwana kuneni omiti momidhingoloko dheni-Mutorwa

0
33

Omutoolinkundana

Windhoek-Omukwashigwana kehe moNamibia okwa indilwa opo a shonopeke etete po lyomiti nenge embugaleko lyomudhingoloko gwe. Eindilo ndika olya ningwa kuMinista gUunamapya, Omeya nOmakuti , John Mutorwa mesiku lyokudhimbulukwa okutsika omiti muuyuni, hali dhimbulukiwa etitano etiyali momwedhi nguka omumvo kehe.

Mutorwa okwa ti okukokola naku shonopekwe nomukalo omuwanawa ngoka wo tagu pitike aantu mboka yi ikwatelela kiilongomwa yomomakuti ya tsikile nokuhupa muyo.

Okwa shongo wo omukwashigwana kehe opo mesiku ndika a kale nontseyo yesimano lyokukuna omiti osho wo okudhikaleka po.
Mutorwa okwa ti esiku lyokukuna nokutsika omiti muuyuni olyo ompito yokudhimbulutha uuyuni esimano lyomakuti osho wo lyomaludhi ga yooloka gomiti.

Na olyo esiku moka aantu oohandimwe haya kumikwa okukuna nokutsika omiti omumvo kehe.
Esiku ndika ohali dhimbulukiwa etitano etiyali kehe lyomwedhi Kotoba oshilongo ashihe,okunyanyukilwa nokupandula osho wo oku eta po ontseyo kombinga yongushu yomiti niilonga yadho muushitwe.

Mutorwa okwa kumike oshigwana ashihe opo “shi tsikile noku tsika omiti, okudhi gamena nokudhikaleka po”.
“Nashi kale oshinakugwanithwa shetu atuheni nosho wo oohandimwe tu itule mo okusoshimpwiyu kutya omiti dhomoshilongo nuunongo kombinga yadho otwe wu thigila omapipi ta ge ya”Mutorwa a indile.

Okwa ti omakuti ogo ‘omapunga guuyuni wetu’, go ogo ishewe onzo yoonkondo muuyuni wetu.Onkene esiku ndika lyokutsika omiti olya simana opo tu idhimbulukithe esimano lyomakuti gayooloka nokutyapula nkene ngaka ha ge tu kaleke po nokutu palutha.
Nuumvo otatu dhenge omuthindo ku nkene omakuti taga hwepopeke onkalamwenyo yetu, moku tu pa omuyenye noonkondo ndhoka twa pumbwa.
Iikuni oyo onzo onene yomuyenye na oyi lile po konyala ooperesenda 45 dhoonzo dhomuyenye hagu pepalekwa muuyuni. Ngele elongitho lyiikuni olya humithwa nawa komeho ndika otali vulu okuyumudha po omahupilo gokomikunda osho wo okupendula oongeshefa miitopolwa mbyoka.

Omakuti oga siikila konyala oshititatu shimwe shevi na ogo olukalwa lwiinamwenyo yayooloka yilile po ooperesenda 80 dhiikwavi. Onkene omakuti oga simana mehumokomeho lyokukaleka po oondya dha gwana, oku iyutha kelunduluko monkaloyombepo osho wo okukeelela iiponga yopashitwe.

Okwa tengenekwa kutya konyala aantu obiliona 1,6 ohaya longitha omakuti ongo onzo yoondya, omuyenye , egameno, nonzo yiiyemo esiku kehe muuyuni.

Edhimbuluko lyesiku lyokutsika omiti nuumvo olya ningwa etitano lya yi nomuti gwonuumvo, ‘omusi” noshipalanyolo shonuumvo osho “Omiti odho ohaiveleka yuushitwe , hupitha omiti wu hupithe oomwenyo” Konyala aantu ye vule oomilliona 200 muuyuni ohaya longitha iikuni mokuteleka noku imonena omuyenye.

Mutorwa okwi itaala kutya omiti nomakuti otaga vulu oku yamukula komashongo geyonagulo lyuushitwe osho wo eshonopeko lyoluhepo momikunda unene tuu okushitalela miilonga yomiti, megandjo lyiikulya, lyiiyemo nokukaleka po omukanka gwoonzo dhopaushitwe.

‘Nonando otwa taalelwa komashongo ogendji ngaashi eteto po lyomiti shaali pampango, embugaleko , elunduluko monkalombepo osho wo einyengo lyaantu okutunga momakuti , epangelo lyaNamibia oli na oshinakugwanithwa oshinene okugamena oonzo dhomakuti goshilongo’ Mutorwa a ti, nokutsikila kutya opuna oopatololi okutala mboka taya mbugaleke nokuteta omiti yaana uuthemba okushininga, oshikwawo ohali gandja wo uuthemba kwaamboka taya tyaya iikuni noku teta wo mpoka sha pumbiwa. Pamwe naashika epangelo otali kumike oshigwana mokutsika omiti pomahala ga yooloka. Olina omahala gokulanditha omiti omishona opo oshigwana shi vule okudhi ilandela noku ka tota iikunino yawo yomiti dhominzile naandhoka dhiiyimati. Mutorwa okwa ti shika osha ningwa nomahala ga yooloka moshilongo oga kunwa omiti konyala nookuli oohekatala 352 odhi na omiti dhiiyimati nodhominzile moshilongo.

Okwa indile oshigwanaga shi dhimbulukwe esiku lyokukuna nokutsika omiti, mokudhi kuna dhoshili osho wo okusila omakuti oshimpwiyu dholela mokuyanda nokukeelela embugaleko, oshoka aambugaleki mboka haye shi ningi mokuteta yaana epitikilo nokufika omapeya, oya yalulilwa mongundu yaalongi yiikulumuna.

LEAVE A REPLY

Please enter your comment!
Please enter your name here