Ovalilafya va tondokela kOidiva

0
1444

Komutoolinghundana

OKONGO-Omangungo ovalilafya okwa tondokela kOidiva moshikandjohoololo shaKongo moshitukulwa shaHangwena, keefya domulongi, omukondjelimanguluko Lylje Feekeni Mutileni Shikukumwa womido 78. Shikukumwa okwa xulifila moshipangelo shaWindhoek omwedi ou, nokwa pakwa momaendo puxe omutumwa Stefanus Mutileni eongalo Okongo, Olomakaya la djako.

A dalelwa metumo kOkavango kuxe omutumwa Stefanus Mutileni,a ka tumwa vali kEenhana manga Lylie e na eedula mbali, onghee ehongo okwe li tameka pEenhana, taka twikila kEngela moshitukulwa shaHangwena,opo nawa a ka ya kouhongi kOkahao moshitukulwa shaMusati modula 1956-1960. Mutileni – Shikukumwa eshi a pita okwa longa ofikola kEnyana, kOidiva, kOmundaungilo. Molwa oita yekondjelomanguluko laNamibia ova dengwa luhapu kovakwaita vaSouth Africa nokumu valula omutwe, onghalo oye va fininika namushiinda shaye Junias Hamunjela va tauke mOidiva taka longa ofikola manga kOngwediva Control 1986-1987.

Oilonga yekondjelomanguluko okwe i tameka nale 1966 pamwe navakwao 32 va ile keenghundafana dokoEast Londen koSouth Africa, oko va dja va tukuka meengudu mbali shinasha nopolitika yaNamibia nouwa welongo.

Mokwaalukila keumbo ova dimina ashike ku tungwe ofikola yeembolo kEngela moshitukulwa shaHangwena noshipangelo shepangelo mOshakati. Vakwao vahapu mongudu ei inava mona emanguluko laNamibia.

Ova longa oilonga I pondola mokuyakula ovakondjelimanguluko ngaashi 1980, Mutileni Shikukumwa pamwe novashiinda shaye vooHamunjela pOidiva, va fela omwashe yoshikulo elambo ndele tava uvikeko noiti, nova kala have mu hakula, ve mu kosha nove mu pa oikulya fiyo a veluka nokushuna koAngola. Mutileni Shikukumwa fiku a hangelelwa keembulu momukala wambulaye, ta twaalele oikulo ouvalelo, oikulya okwe i pa ovakwanghala va li polupale, ashike 1977 fiku a hangelelwa ta imbi omaimbilo oSWAPO okwa dengekelwe komutwe neenghono, opo a dja opo a ninga omunghundi fiyo opomafiku a xuuninwa.

Omahepeko opefimbo lekondjelomanguluko, okwe va fininika va taukile kOngwediva moshitukulwa shaShana oule womido mbali.
Manga va li kOngwediva, 1986 omushamane waye Samuel Shikukumwa a kwatwa kounghundi oo e li muwo fiyo onena. Nande a ninga omido te liyave okudja pedengo komutwe ounghundi wolela owa didilikwa 2014, nowa divilika muMaalisa 2017. Okwa xulifa momafiku a 7 Kotoba, neudo, a fiya ko ovana vaheyali, ovalumennu vavali novakainhu vatano, ovatekulu 19 novatekulululwa vavali. Ovapopi aveshe ova holola oudiinini, ohole neididimiko monghalafano.

LEAVE A REPLY

Please enter your comment!
Please enter your name here