A tete oongombe dhamumwayina nekaatana

0
673

Maria Namupala

ONANKALI-Omukalimo gwomOkayala mOnankali moshitopolwa Oshikoto Kefas Amutenya okwa tetelwa oongombe dhe kumushiinda oshiwike sha ziko, sha ningilwa megumbo lya mushiinda gwe.

Pahokololo lye Amutenya okwa ti oshiningwanima shika osha ningwa oshiwike shayi. Okwa ti otaya fekele kutya oongombe dhe odhayi megumbo lye ethimbo lyomutenya, na mwene gwegumbo ngoka oya kondeke oongombe pamwe nuunona we nokudhi teta. Okwa ti oshiningwanima shika otashi uvitha nayi molwaashoka, itashi vulika wu tete oongombe dhamushiinda shoye, nongele owu wete dheku yonene sha, oshiwanawa wudhi thindikile kumwene ne tamu ikundu mu tale kutya omukundu ngoka tamu gu kandula po ngiini amuhe.

Ta gwedhapo kutya oongombe ndhoka dha tetwa ndatu odha tetwa pomakalo nopoombunda, omanga okatana kamwe ka mokolwa omushila guli owala kuunyengenyenge tagu hala okutokokako. Okwa ti Osoondaha ndjoka okwa li a mono oongombe dhomuusita we dhina iilalo pomakalo mpoka, nokwali a ningi onkambadhala a landule omakondo, naasho ega landula ogayi sigo omegumbo lyamushiinda, moka ta ti okwa adha mwene gwegumbo pamwe noyana ya kuutumba.

“Sho nda piti osheelo ondali nda kundwa komankalala naasho ya matuka taya tidha oongombe, ondaka mona woo lwanima ekaatana li na oombinzi oontalala nomafufu, shoka sha pendje nosheeta puuyelele kutya nani oongombe dhandje omo dha zi moka dha tetwa,” Amutenya ta ti ngaaka.

Okwa yelitha woo kutya yo aamwayina ya valwa koohe aamwayinathana, noyeli aashiinda, ashike uushinda wawo osho owala wa kala ngaaka, kehethimbo pokati kawo opuna owala otjokotjoko yaa shi wike mpoka ha yi zi.
“Pethimbo nda yi megumbo moka onda kala tandi ya pula, ya popye ngele oyo ya tete oongombe, noya lombwele ndje kutya oyedhi tetele shike, ashike oya tindi, konima sho ndaka mona kamwe komuunona we ethimbo lyomutenya oka ka lombwela ndje kutya yina, oya a ti naya tete oongombe ndhoka sho dheya megumbo lyawo noku yonagula,” ka ti ngaaka.

Amutenya okwa popi woo kutya nonande egumbo ndyoka tali monika lya monithwa iihuna, shoka tati osho she etitha mushiinda a tete oongombe ndhoka, sigo esiku ndika okwa tinda okwi itaala kutya oye edhi tete.

Ta ti ye kena uuwinayi ando ashike okwali owala a hala uuve oshili ngele oyo ya tete oongombe dhe. Ta ti aluhe uushiinda owuna iinima oyindji, no kwa ti ota hulile owala mpoka ita pula ko we nonande uuvite omapopyo sho mushiinda te ende ta popi kutya oongombe okwedhi tete molwaashoka odha yonagula egumbo lye.

Otwa ningi oonkambadhala tu mone ngoka ta kuti oye a tete oongombe ndhoka Helena Amutenya, okwa ti haye nande a tete oongombe, no ita dhimbulukwa no ina mona megumbo lye mweya oongombe.

“Tse naanegumbo lyandje otwa penduka Osoondaha twa adha egumbo lya hanagulwa po koongombe, kakele inatu dhi mona, otandi koleke kutya oya adhamo ekaatana li na oombinzi oontalala nomafufu ashike kandishi kutya olyali tali longithwa shike,” Nakulundililwa okuteta ta yelitha ngaaka.

Okwa ti okwa hala edhina lye li yelekwe molwaashoka ota lundililwa oshinima shoka inaa ninga, naye okwa koleke kutya nonande yeli aamwayina kehe thimbo uushinda wawo hawo naanaa, nolundji nenge poompito odhindji ohaya kala taya nyenyeta owala ngaaka nokiinima yaafele.

LEAVE A REPLY

Please enter your comment!
Please enter your name here