Bongo Maffin a ti ota galuka pehulilo lyomumvo

0
24

Omutoolinkundana

Windhoek-Konima yomimvo 12 ya topoka aapalindjila yomusiki yoludhi lwoKwaito muumbugantu waAfrika yedhina Bongo Maffin oya tegelelwa ya galukile kumwe nokuhika ongalo ongo ongundu yimwe. Shika ota ye shi ningi sha landula sho yali ya imbi pamwe mokavideo komalanditho koCastle lager. Ongundu yaahikingalo yoBongo Maffin oya thikama po muThandiswa Mazwai, Stoane Motswako Saote na Anesu Mupembi. Ongundu ndjika oya sindana omapapa gomusiki gAfrika omimvo 2001, 2002, 2006 na oya li ya hogololwa okupewa epapa lyomusiki lyuuyuni hali gandjwa koBBC momumvo 2006. Ongundu ndjika oya sindana omapapa gomusiki moSouth Africa momimvo 1999, 2002, no 2006.

Ongundu Bongo Maffin ndjoka ya totelwe po omumvo 1988, oya li yi holike na oya kala hayi hiywa okuka imba miitopolwa ya yooloka muuyuni na oya imba nokuholoka pomahala goku imba pamwe naa imbi aanamadhina ngaashi Stevie Wonder, aanona yaBob Marley, Ladysmith Black Mambazo, Chaka Khan, Sean Paul, osho wo Steel Pulse.

Oshilyo shongundu ndjika Saote okwa ti omathimbo ga ziko oya li ya imbi pamwe momalanditho gaCastle Lager naashika oshe ya hwameke opo ya dhiladhile okugalukila pamwe. Okwa koleke kutya ye niilyo iikwawo yongundu ndjika ya simana moku imba okwaito otaya kundathana kombinga yegalukilo pamwe . Okwa ti iinima nomalongekidho kombinga yaashika otayi ka tseyithwa nale uuna ya holoka.

Onkundana kutya mbaka otashi vulika ya shune kumwe oya uvika oshiwike shika sho omuhona gwokunduluka mehangano lya Kalawa Jazmee a popi mopolohalama yaTshisaLIVE kutya konima yomimvo 12 kehe gumwe a ya nondjila ye aahikingalo mbaka ya sindana omapapa ogendji otaya kundathana okugalukila momusika ishewe.

Oya li ya topoka oshoka Mazwai na Mupembi kaya li taya tsu kumwe kombinga yomatokolo ge na sha nongundu ndjika. “Oshoshili ongundu oya topoka omolwandje na Thandiswa ndele shoka osho ondjokonona. Sho twali twa indilwa okuninga okavideo komalanditho kaCastle Lager, otwa mono sha opala okunyanyukilwa omayooloko getu nokugalukila kumwe omolwa aayambidhidhi yetu mboka yetu pumbwa,” Mupembi a ti.

“Otandi dhiladhila kutya kehe gumwe gwetu okwa kala ta ti sha pehala mpoka ali a hogolola okukala kokule nongundu yetu, ndele nando ongaaka tse otwa kala tuna ekwatathano lyopaumwene. Ngele otatu popi dhoshili kombinga yuunkulungu wetu, osha fa inaatu thiga po kwali ongundu yetu nenge omusiki , noku imba kwetu okupe nenge okukulu natango otaku kala kwa pandika kaalanduli yetu,” Soate osho a lombwele DESTINY Connect.

Omuwiliki gwa Kalawa Jazmee Oskido okwa tindi okukoleka sha kombinga yonkundana ndjika, ihe ongundu ndjika oya li moonkundathana ndhoka dha ya komeho lela, onkene ngashingeyi otwa tegelela ashike iinima yi ye pomahala,” osho a lombwele TshisaLIVE.

Mupembi okwa ti ongundu ngashingeyi otayi longo kombinga yokuhika uungalo ookamwe nookamwe mboka ya hala okupititha pehulilo lyomumvo. “Itatu uvaneke okupititha oalbuma mbala, ndele otatu nduluka noku imba uungalo ookamwe manga. Aalanduli yetu naya tegele sha omanga omumvo nguka inaagu hula po.,” Mupembi auvaneke.

LEAVE A REPLY

Please enter your comment!
Please enter your name here