Elongo lyiipala moosikola

0
77

Ope na omatompelo kutya omolwashike aantu inaa ya panda omusindalongo omupe melongo li na sha niipala, ngiika oshoshili kutya mbaka ina ya panda oshoka ngoka inagu futika nando osha kombinga yoshinima shoka. Ngiika ina ye gu hokwa molwashoka itagu longo nando aanona yi iyageke okuya momilalo omanga ethimbo lyawo inaali thika. Oshikwawo ina ye gu pandula oshoka otagu longo wo aanona ya ye momilalo nomikalo inaadhi taambiwako. Okulonga omunona kombinga yokutya omushike pamilalo nenge uukwashike uuvite we mu opalela inashi kala oshinakugwanithwa shomulongisikola nenge shenongelo. Shoka oshinima aakuluntu ye na okulonga oyana. Egumbo kehe, efamili kehe noshigwana kehe oshi na okukuthombinga momukalo gwankene aanona ye na okuputudhwa. Oshoka kashi shi oshilonga shaalongi nenge shosikola okulonga omakankameno kuunona.Shika oshilonga shaakuluntu.Oshoka otashi vulika onga aakuluntu tu kale inaatu longa iinakugwanithwa yetu, kakele osikola ngiika otayi kwatha ashike mu shika uuna kegumbo lyomunona kaakuna omukuluntu. Osikola otayi vulu okukwatha okulonga ontseyo ya pumbiwa okuhomateka uunona wu vule oku igamena komahepeko gopaihulo. Ndika otali vulu okukala okulonga omunona uuna e na okutinda na ishewe okukoneka oonkambadhala dhekwatonkonga nenge dhehepeko komukwawo noshowo nkene ye na okuyanda okuninga omapunda. Ihe oosikola inadhi longithwa okunkondopeka aanona ya tseye nkene taya yi miihulo. Oonkundathana moshinima shika odha pumbwa okuningwa oshilongo ashihe omanga omusindalongo nguka inaagu ziminwa okulongithwa ngaashi gwa gandjwa kwaamboka ye gu thaneka noku gu nyola. Kutya omusindalongo guni Namibia a hogolola nguka nagu kale tagu uvikako kuNamibia nokaaNamibia unene tuu okushitalela monkalo kutya konyala oyendji oyi itaala muKristus nelongo lye, oshigwana shoka shu uvite etumba kuuthiga washo mboka , noohedhi dhasho. Ngiika otwa pumbwa okutala kutya ookuku oya longele ngiini pethimbo lyawo okungambeka omapunda nuusimba maagundjuka oshowo okuyanda uufukulume watya ngaaka. Otashi vulika ita tu ka vula okulongitha omikalo ndhoka molwashoka itadhi tsu we kumwe nethimbo lyonena. Ndele nee otashi vulika ndhika dhi tu kwathe opo tu etepo oondjila dhimwe ndhoka tadhi tsu kumwe noohedhi dhetu. Tse katu shi aa America nenge aaEuropa. Tse otwa yooloka kuyo. Tse tango aAfrika nolutiyali aaNamibia. Kutya elongo lini tatu pe aanona yetu otatu ya pe ndyoka tali ya holola kutya mbaka aaAfrika naaNamibia. Aana yetu kayena esiku ya ka ninge aa Europa nenge aaAmerica, nando oya longwe omikalo dhoshiEuropa nenge dhoshiAmerica. Natu kongeni epotokonono lyomukundu ndyoka tu uvite tali ti sha kutse na inatu eta mo ashike omusindalongo ngaashi gwa shangwa ko UN nenge kwaamboka ye gu ngongo po nando mbaka aaEuropa nenge aaAmerika. Tse aaNamibia otushi shoka shetu opalela naashoka twa pumbwa. No inatu pumbwa okulombwelwa kuyalwe.

LEAVE A REPLY

Please enter your comment!
Please enter your name here