Fileni iilambo mbyoka ngele hasho oveta oye ya

0
429
dav

Omutoolinkundana

Windhoek-Omahangano ngoka haga fulu omavi shaali pampango oga pewa sigo omasiku 30 Maalitsa 2018 okuthaneka nkene taga ka fila po iilambo moka ga kutha omavi gokutungitha ngele omatungo nenge oondjila. Etseyitho ndika olya gandjwa unene sho kwa konekwa moshitopolwa shaShana mu na omalambo ogendji ga ipika omutalelo gwoshitopolwa shoka.

Omahangano ngoka haga fulu omavi kaashi li paveta muumbangalantu woshilongo oga lombwelwa opo ga hulithepo okufula omavi miitopolwa yokolundume moompadhi oontalala nosho wo yi iyuthe koveta yOmudhingoloko nenge Environmental Management Act 2007 monakuyiwa, ngele inaya vulika nena otaya ka katukilwa oonkatu dhopaveta.

Ombelewa yaKomufala gwomudhingoloko oyo ya gandja elombwelo ndika kaafuli yomavi opo ye shi hulithepo. Ombelewa oye ya pe wo oshinakugwanithwa opo mbaka ya filepo omalambo ngoka yo ya fula.

Oshikwawo etokolo lyaKomufala gwomudhingoloko Teofilus Nghitila lya ningwa omasiku ga piti otali utha kutya ina pa fulwa we iilambo yomavi momapya miitopolwa yomuumbangalantu .

Ehangano China State Construction, ndyoka tali tungu olutenda pokati kOshakati-Ondangwa, Otesa Construction na Nickel Brick ogo gamwe gomwaangoka ga tumbulwa itaaga simaneke ooveta dhomudhingoloko moshilongo.

Pahapu dhomunawino muuministeli womudhingoloko, Ipeinge Mundjulu, okwa ningi omakonakono kombinga yaafuli yomavi ya indjipala muumbangalantu eli ningi pokati komasiku 14 nomasiku 19 August nuumvo mOmaalala, Epukonoyana, Amutanga, nIikelo moshitopolwa shaShana osho wo Okalondo mOhangwena nomOnandjaba moshitopolwa Omusati.

“Oshikondo shetu osha kundana nomaipulo omanene oshinima shoku fula evi ndika nomukalo tagu halakanitha. Okufula omavi huka okwa yonagula wo nomapya gokulonga” Mundjulu osho a nyola.

Omolwa iizemo yekonakono ndika oshikondo shika osha lombwele omahangano ngaka opo ga hulithepo okufula omavi.

Elombwelo ndika olya ningwa sha landula ombilive ye eguluka ndjoka ya nyolwa komunandjungu gwoAffirmative Repositioning (AR) Job Shipululo Amupanda, ngoka oye a nyenyeta oshinima shika kutya omapya gomomukunda gwawo ogu udha ashike omalambo ngoka ga fulwa kwaamboka taya kongo omavi. Okwa nyenyeta wo kutya omalambo ngoka oga thigwapo ashike inaaga opalekwa nenge ga filwe nongashingeyi oga ninga owala oondama momapya gomomukunda Omaalala nopomahala galwe monooli.

Nghitila kuyele okwa londodhele aafuli yomavi shaa li paveta, mboka haya mono mo iimaliwa oyindji na oya kala ya dhina elondodho ndyoka kutya ngele itaya vulika, okutaaguluka oveta huka otaku key a landulitha nokuya falitha kompangu.

Iilonga mbika yokufula omavi shaa li paveta otayi ziminwa owala ngele omufuli gwomavi okwa pewa onzapo yemu pitika okufula evi, shoka sha etwa kehumokomegho miilonga yomatungo ndyoka lyu uka pombanda miitopolwa yokuumbangalantu.

Amupanda sho a thiki pOmaalala okwa adha iilambo oyindji ya kuthwa omavi iikulu nosho wo iipe yili momapya nosho wo momahenene. Mbika oya li ya thigwa po inaa yi filwa nenge ya silwa oshimpwiyu. Mbala okwa shangele kuNghitila te mu hokololele shoka a mono no kwa adha momukunda gwawo iilambo ya nika oshiponga nenge nookuli oondama dha fulwa momapya no inaadhi opalekwa nenge dhi filwe po. ‘Utye aafukedhi osho wo aakwiilongo mboka ye na ookondalaka dhokutunga , unene aaChiina oya tsikile okufula iilambo momapya gomahangu. Omukunda gwetu ngashingeyi ogu udha ashike oondama”
Okwa dhimbulutha wo Nghitila kutya ombapila ndjoka, okwa tumina okopi kelelo lyomuthigululwakalo gwOndonga ndyoka lya yamukula noku yambidhidha oshinima shika noku tegelela shoka tashi landulako.

“Mokukondjitha oshinima na unene sho shi na sha nomudhingoloko negameno lyagwo, sho mbika yi li mewiliko lyoshikondo shomudhingoloko, otwe shi kundana wo kutya omautho gomudhingoloko otaga ti omufuli gwevi kehe okuna oku indila ombapila yi na sha nomudhingoloko. Otwa hala opo aantu mbaka ya kale wo haya pewa oombapila dhina sha nomudhingoloko, ndhoka wo tadhi utha kutya oshike ye na okuninga uuna ya mana oku kutha omavi miilambo mbyoka.,” Amupanda osho a galikana.

Caption (Pic: Sand Burrow Pit.jpg): Omalambo ogendji ga nika oshiponga oga thigwa momapya gaakwashigwana momikunda dhokuumbangalantu.
Caption (Pic: Sand Illegal Trucks.jpg): Omaloli taga fulu moshilambo gaana uuthemba okushininga.

LEAVE A REPLY

Please enter your comment!
Please enter your name here