Moshitila Mwa Z’Ondjupa: Uuyogoki nelandulathano

0
57

Mokukala kwandje onda koneke kutya oshinima shotango sha simana opo ongeshefa yi ende nawa, osho okudhiginina uuyogoki nelandulathano. Uuyogoki nelandulathano osho oshinima shotango, omunangeshefa ta vulu okuhilila nasho aalandi kongeshefa ye Omulandi ye mwene okwa hala iinima ya tsilikwa nawa, yo ya pupulwa oontsi ya yela nawa, noyi li melandulathano ewanawa. Omulandi kehe kutya nduno ogwepipi li thike peni, omugundjuka nenge omukulupe, oha kala wo a hala, ehala lyo lyene li kale lya yela.Oshinima sha tya ngaaka,ohashi mbekula, hashi hili nokunyanyudha aalandi noku ya kaleka po. Sho nda ningi omunangeshefa omunene, petameko aaniilonga yandje oya li haya lala pongeshefa yandje, opo nde ya tungila oondunda dhokulala. Kehe komwedhi otwa li hatu ningi oshigongi naaniilonga yandje okupaathana omayele. Otwa li wo tu na elandulathano kutya, omuyakuli kehe pokatopolwa ke na kale ta ndhindhilike nokunyola shoka tashi pulwa kaalandi, kutya nduno otu shi na nenge katu shi na. Iinima ayihe mbyoka tayi landwa tayi pupo, ne yi ndhindhilike wo pamushangwa.Uuna tatu gongala otwa li nduno hatu tala iinima mbyoka hayi pulwa olwindji kaalandi, kaatu yi na momalandithilo. Kombinga wo onkwawo, otwa li hatu tala iinima mbyoka hayi landwa meendelelo, opo tu kale hatu yi mbesitele wo meendelelo nopethimbo. Shika oshe tu kwatha okuhilila aalandi oyendji kongeshefa yetu. Aanangeshefa oyendji ihaya ningi ngaaka, ihaye ya pamwe naaniilonga yawo noku ya pula omadhiladhilo gawo kutya: Sho mwa tala iinima otayi ende ngiini.? Opwa li aantu haya ende taya shingitha oonguyo noongaku, Iinima mbyoka kanda li handi yi landa ongame awike, ihe onda li handi pula aaniilonga yandje, opo tu hogolole atuhe pamwe nayo iinima yopashinanena, mbyoka ya halika kepipi lyopethimbo ndyoka. Aaniilonga yandje onda li handi ya pula tandi ti “One hamu longo mongeshefa, opu na iinima mbika. Oyi li ngiini? Iiwanawa nenge iiwinayi?” Aaniilonga ohaa yamukula ndje nduno taa ti, “Shika osha halika nohashi kala tashi pulwa nayi, natu shi mbesiteleni” Komukalo gwa tya ngaaka oshe ende tashi tu dheula atuhe pamwe naaniilonga. Shika osha hala okutya, mwene gwongeshefa ota dheulwa kwaamboka haya kala ya thikama moolaka, naamboka haya kala ya thikama moolaka otaya dheulwa kumwene gwongeshefa. Okuninga ositola yomaalaka, ano moka aalandi tayi iyakula yo yene, mOwambo ongame nde shi ninga tango. Omadhiladhilo ngoka onde ga mona kuushimba, oko nda mona oositola nkoka aantu hayi iyakula yo yene. Pethimbo mpoka onda kala ihaandi landa we iilandithomwa yandje mooholosaila dhomuushimba, moNamibia, ihe onda kala handi ka landa koSouth Afrika, hoka oonguwo hadhi ndulukwa. Onda tameke oholosaila tango pOkonde No 1.Aanangeshefa yetu yomoshitopolwa ayehe omo nduno ya kala haa landa, yo taa ka landitha. Ngame okuza mpoka kOkonde No 1 onda gwedha ko nduno omaalaka.
Aantu sho tayi iyakula yo yene momaalaka, yamwe petameko oya li ya tila kutya iinima otayi yakwa po , ashike kasha li tashi vulika.

Ethimbo ndiyaka olya li ethimbo ewanawa, naafuthi oya li aashona. Aantu oyendji kaya li nando yi itaala muufuthi, onkee katwa li
twa mona uupyakadhi nandenande, wa fa mboka tatu mono ngashingeyi. Aantu mboka ya li inaaya putuka, kaya li ya manguluka okwiiyakula mokuhogolola iilandomwa yawo kuyo yene, ihe oya kala ye li moolaka taya ithana aalandithi taa ti: “Ila wu pendje shontumba nenge shongandi!”Nande ngaa owu ya lombwele ya kuthe yo yene, oshoka omaalaka aalandi ohayi iyakula kuyo yene, kaya li yu uvite ko kutya oshinima otashi ti ngiini. Kombinga yaaputuki, oshinima shomaalaka oya li ye shi panda noonkondo. Pethimbo ndyoka sho twa tameke nomukalo gwomaalaka, aakadhona yandje yaaniilonga sho taya longo pomashina gokufutila, ngame onda li handi kala tandi ya kwathele okupakela iinima yaalandi. Oshinima sha tya ngaaka, kasha li she eta nando uupyakadhi washa, ihe osha li tashi ende nawa. Okupakela iinima yaalandi osha kwathele okweendelelitha eyakulo lyawo methimbo efupi.. Oshinima oshikwawo sha gwedha po osho shika kutya, okulonga naaniilonga yandje , osha kwathele ndje okukala mekwatathano nookastoma dhandje. Omukalo gwomaalaka gwokwiiyakula mwene nando tagu gandja uuwanawa kaalandi, ogu na wo uuwinayi kutya omunangeshefa oha kanitha ekwatathano naalandi yomongeshefa ye mboka yamwe yomuyo haa kala ye na ehalo okutsakanena naye.Koneka kutya ekwatathano ewanawa pokati kamwene gwongeshefa naalandi, oli na oshilonga oshinene, oshoka ohali vulu wo okuhilila aalandi popepi nongeshefa ye.

LEAVE A REPLY

Please enter your comment!
Please enter your name here