Omukuluntu gumwe gwopolisi atamanekelwa uufuthi

0
441

Maria Namupala

ONDANGWA-Opolisi moshitopolwa sha Oshana oya tula miipandeko Inspecta mopolisi ha longele posasiona yaNdangwa.

Kuuyelele mboka twa pewa kopolisi otawu ulike kutya Inspecta Hilma Kayele, okwali anuwa a pula omunandholongo oshimaliwa shooN$15 000 momumvo 2012, ando eke mu kongele hahende ngoka ta kala temu kalele po ashike sigo onena ndjika ina monikila ahende kuKayele.

Konima yoomvula dho kutegelela okwa li a tseyithile opolisi ndjoka ya manga po Kayele omasiku ngaka. Otaku hokololwa kutya omunandholongo ngoka okwa kwatelwe po mo 2012, ta tamanekelwa ekwatonkonga lyokanona ke.

Oya li ya uvathana ando a kale a monikila hahende mbala, kakele osha ka hulila mepiyagano sho Kayele inaa tseyithila omunandholongo kutya okwe mu monena hahende nenge e mu lombwele kutya oshimaliwa okwe shi ukitha peni.

Omunandholongo ngoka okwa yelitha kutya Kayele okwa uvaneke ta kala emu monena hahende mbala ashike ashihe osha hulile mepiyagano, nokwa kwatwa komalimbililo molwaashoka ethimbo ele lya pita po, ye okuli owala mondjedhililo niihokolola ye ihayi tameke nkene a patelelwemo momumvo 2012.

Ta ti oshali shemu thiminike a patululile Inspecta Kayele oshipotha molwaashoka ayihe ya hulile mepiyagano, ye natango ina pewa ompito yokwiifutilamo nenge aye a ka pangulwe.

Inspecta Kayele okwa holoka mompangu ya mangestrata gwaNdangwa , nokwa pewa ompito yokwiifutilamo noshimaliwa shooN$1000, okwa holoka komeho ga mangestrata Jurina Hochobes, omanga Challie Nabot Tangeni Iiyambo a kalele po epangelo.

Oshipotha she oshuundulilwa komasiku gatano ga Desemba shi gandje ompito kopolisi yi manithe omakonakono ga gwedhwa po, nokwa mangululwa eli kondje yondjedhililo a tegelela esiku ndyoka ta holoka ishewe mompangu.

Omunambelewa konakoni nomukwatakanithi koshikondo shiimbuluma moshitopolwa shaShana Hilya Haipumbu okwa koleke kutya Inspecta Kayele okwali a tulwa miipandeko kopolisi yomoshitopolwa ashike ita vulu okutya ko sha sha gwedhwa po koshinima shoka.

LEAVE A REPLY

Please enter your comment!
Please enter your name here