Oranjemund ya yeulukila aveshe

0
58
Ominsta yoilonga nomalweendo Alpheus !Naruseb pamwe novaleli melelo lodoolopa yaOranjemund novakalelipo vaNamdeb, oshoyo ovaleli vopapangelo , pefimbo leyeululo pambelewa lOranjemund.

Tuulikki Abraham

Oranjemund-Odoolopa yokawe oyo ya kala nomina oule weedula da konda po 81, noya kala ina omivelo dapata, hadi yeulukile ashike omunhu ou a ninga eindilo lokuya oko, paife oya yeululwa pambelewa, na keshe umwe ota dulu oku i talela po.

Eyuululo eli ola ningwa kuMinista woyEendifo Alpheus !Naruseb, ponhele yomuPresident woshilongo Omundohotola Hage Geingob, Olomakaya la dja ko. Eyeulo eli otali ti, paife ovanhu ovamanguluka okuya kodoolopa yaOranjemund ngaashi ashike hava i keedoolopa adishe moshilongo.

Odoolopa yaOranjemund oya lukwa modula 2011, noyamona elelo doolopa modula 2012. Oule weedula adishe odo elelo lodoolopa oyo, ola kala meenghundafana da kwata moiti, nelelo lomina yaNAMDEB, opo elelo lomina li yandje, Oranjemund momake e elelo lodoolopa.
Eenghundafana osho da ka pondoka, nodoolopa ya Oranjemund oya yandjwa momake elelo lodoolopa, olo tali lelwa komunambelewa omukulunhu Shali Akwaanyenga, opamwe nookansela melelo lodoolopa.

Mokuyuulula pambelewa odoolopa yaOranjemund !Naruseb okwa indila ovaleli vodoolopa, ovaleli vopashikandjohoololwa, oshoyo ovakwateli komesho vaNAMDEB, ve li mange kumwe, ndele tava longele kumwe, opo ashike tava dulu okuyambula po nokutunga odoolopa iye komesho.
!Naruseb okwa yandja oshiholelwa, shomina yaRossing Uranium oko ali ha longele, ta ti omina yaRossing Uranium nayo oya kala noumwene wodoolopa yArandis, ashike paife odoolopa yaArandis oili momake elelo lodoolopa.

Kansela woshikandjohoololwa shaOranjemund naRosh Pinah Lasarus Nangolo, pefimbo ta pandula aveshe ovo vali ve ya keyeululo pambelewa lodoolopa yaOranjemund, omo yoo mwali mu nAttorney General Sakeus Shanghala, okwa ninga eindilo kepangelo opo li tale nomesho manene odoolopa ya Oranjemund, oyo Kansela Nangolo a tumbula kutya, otai ka yada ovanhu.

Ounona mofikola oyo ili mo oyo aike yepangelo itava ka wana mo. Okaklinika kepangelo oko keli modoolopa yaOranjemund, itaka kadula okukwafela ovakwashiwana ngee va hapupala.

Momhito ei Nangolo okwa indila opo ku tungwe diva ofikola yepangelo, oshoyo oshipangelo shepangelo modoolopa ya Oranjemund.
Moshipopiwa shaTony Bessinger omukalelipo waNamdeb okwa ti, epatululo lodoolopa yaOranjemund otali eta exumokomesho, na otali pale ondjila yokueta elunduluko. Bessinger okwa tumbula kutya ehangano laNamdeb otali twikile nokuyambidida mokuyambula po oo Oranjemund.

Minista yomauyelele nomakwatafano Tjekero Tweya naye opo ali peyeululo pambelewa lodoolopa yaOranjemund.
Efiku olo tuu olo odoolopa yaOranjemund ya yeulwa, okwa tulwa yoo odopi ponhele opo pafanekwa tapa ka tungwa endiki leengeshefa, olo tali ka kosha oshimaliwa sheemiliona dili N$130. Konima eshi kwa tenhekwa odopi, nokutala kutya, endiki leengeshefa olo otali ka kala naanaa, lafa peni, osheendo osha twikila noku ka yeulula epandavanda olo la lukilwa omuPresident woshilongo Omundohotala Hage Geingob.

LEAVE A REPLY

Please enter your comment!
Please enter your name here