Young Chiefs a tameke nuunkundi

0
39

Shipi Elago

OSHAKATI-Okapale kaShakati oka li kuudha olyomakaya nosoodaha oku ninga oombangi sho uudhano woliha yopombanda yopashigwana yoNPL ya li ya galukile mondambo.

Ashike aayambidhidhi yoYoung Chiefs nando oya li ya holoka momiyalu inaa dhi monika nale mOshakati Young Chiefs okwa li a ndopa okusindana omaudhano ge agehe gaali megumbo.

Olyomaka Young Chiefs okwa li a patulula okapale noBlack Africa muudhano mboka wa li itaa wu nuwa omeya oshoka oosipana adhihe odha li dha hala okuulika kutya odhi ilongekidha.

Amathekie okwa li a dhana okalimba komakutsi konima sho aadhani ye yokonima ya li ye ethelemo etanga lyanika uukatalume noku eta eyalulo likale 0-1 oku ya po ka fudhepo.

Okuza pokafudhepo Young Chiefs okwa li a ningi oonkambadhala ashike omukwati gwoBlack Africa okwa li a lungudja ngokambishi sho a li a kwata mo omatanga agehe ngoka a li a thangelwa, noku kwathela Black Africa a mone iitsa iitatu neyalulo lyahugunina Young Chiefs 0-1 Black Africa.

Engungo lyaayambidhidhi olya li lya shuna li na eyeme ashike olya li li na eyinekelo kutya omahodhi ota ye ya ye giipugulile kokambindja koYoung African osipana yokOmaheke ndjoka opo ye ya moliha ndjika.

Ashike Young African ngoka a li eya muudhano mbuka ena omushila gu li pombanda konima sho a li a dhenge Chiefs Santos 0-2 mOshomeya okwa li a kumitha Young Chiefs naayambidhidhi sho a li a pitile nokoola yimwe mominute dhopetameko ndjoka ya li ya tulwa mo kuMatroos Revered , Young Chiefs okwa li a tameke okuundula emanya a manamo ta ningi iiponokela ye ta dhimbwa okweedhila komweelo gwokonima ohaluka okasipana okeekelamo ishewe okoola yimwe okupitila mokamati Mbewe Chrispine.

Okoola ontiyali oya li ya dhenge aayambidhidhi yoYoung Chiefs pomutima na yamwe oya li noku li ya thinda hoka ya yambukile omanga nokahiya kedhingoloko lyotango inaa ka adha.

Oonkwengu dha Young African okwa li a kokola iilalo ina yi pola sho a li a gwedha mo ookola ontitatu oku pitila mokamati Matroos Revered omanga young Chiefs a li a tulamo okoola yimwe oku eta eyalulo li kale 3-1 oku ya pokafudho.

Okoola ndjika oya li ya pe aayambidhidhi etimwaumbwile kutya ngiika edhingoloko etiyali otali kala lya Young Chiefs noku lapako ookoola ndhoka sho young Chiefs a li a lapako okoola yimwe ishewe ashike Young African okwa li a tulamo okola ontine ndjoka ya li ya ngwangwanenke aayambidhidhi mboka ya li ye na etegameno kutya okoola otadhi lapwako.

Jackson Johannes gwoYoung Chiefs okwa li a tulamo okoola mominute ntano dha hugunina ashike ka ya li ya gwana sho eyalulo pokahiya kahugunina lya li 3-4 muuwanawa woYoung African.

Okasipana haka oke li ka ninga omukalondjigilile okudhenga Young Chiefs oshoka oko wo ka li ke mu umbumo mekopi lyoSkorpion Zink nuumvo mOtjiwarongo.

LEAVE A REPLY

Please enter your comment!
Please enter your name here