Aayelele oyendji moshilongo ngashingeyi oyeli mosikola

0
42

Loide Jason

ONGWEDIVA-Aagundjuka aayelele omathele 800 oyeli mosikola moshitopolwa shaHangwena. Shika osha hololwa komuhumithi komeho gwendiki lyaayelele moshitopolwa shoka Thomas Puleinge.

Omunambelewa nguka okwa hokolola kutya ngashingeyi ombelewa yOmupevi Peresindente Nicky Iyambo oya tula po omilandu okukwathela omihoko ndhoka inaa dhi putuka moka mwa kwatelwa aayelele.

Puleinge okwa ti aanona mbaka ngashingeyi mboka yeli mondondo 10 ohaya mono eyambidhidho lyooN$ 500, kehe komwedhi opo ya lande iipumbiwa yawo yopauntu.

Puleinge okwa popi ndhika mongodhi sho a dhengelwa kuKundana metitatu lyoshiwike shika shi na sha nonkalo yaayelele moshitopolwa moka.

Ayelele moNamibia – noshowo Ovatwe naOvatjimba yokoKunene – oyo yamwe mokati koshigwana ye wetike ya thigala konima meputuko. Onkene epangelo olye ya yoololamo okuya kwathela owina opo li ya tule pomuthika guli hwepo pamukalo nguka.

Ngaashi moku ya sila oshimpiwuyu nelalakano oku ya yambula po ya adhe mpoka pe na aantu ooyakwawo.
Ombelewa yokuyambula po aaNamibia mboka ya thigala konima meputuko yili kohi yomupevi minista Royal Jonah Kxoa /Ui/o/oo, okwali ya
holola eiyuvo lyonayi sho aanona mboka ihaa ya ningi nawa ngele otashiya melongo.

/Ui/o/oo okwa hokolola kutya ooperesenda 60 dhoshikondo sheyalulo lyoshimaliwa ohashi yi keyambidhidho lyosikola yaanona mboka nonande ihaya ilongo nuudhiginini.

Ashike nguka okwa ti mboka taya mana kiiputudhilo yopombanda aashonashona nonande oyo haya longitha oshipambu oshinene shoshimaliwa.
“ Ohatu ndopa okulonga iiyimati mbyoka hayi kwatwa noonyala. Onkee otuna okutalulula oompito dhika opo tu kumike aanona mbaka ya vule okulonga nuudhiginini,” minista a ti ngaaka.

Nuumvo ombelewa ndjika oya patulula osikola moshitopolwa shaKunene moka muna aanona mboka 200.
Na omimvo dha piti oshikondo osho tuu shoka oku pitila mepangelo oshali sha tungu oomboloka dhosikola dhili komukunda gwedhina, Otjiyandjasemo, Otjomuru , Ohaiyuua moshitopolwa omo tuu moka.

Okwa hokolola wo kutya mboka yeli mondondo ontimugoyi okuuka pondondo yotango ohaya mono oshimaliwa shoka hashi monika kaanona mboka yeli moluhepo shooN$250 kehe komwedhi.

Ihe okwa fatuula kutya mboka woo yeli kohi yondondo onti10 onkee ngaa haya kwathelwa niipumbiwa yonkalamweno koomuma ngaashi oothewa dhoku iyoga nosho tuu.

“Mbaka otaya pewa sha kepangelo opo ya kumikwe okukala mosikola sigo okondondo ya hugunina ngaashi aanona ooyakwawo mboka ya za komihoko dha putuka,” osho Puleinge a fatulula.

Okwa popi kutya okuna omwaalu gwaagundjuka mboka ngashingeyi ya mana ondondo 12 naamboka ya hulila mondondo 10 ye vule15 opo ya taambelwe moshiputudhilo shuungomba mOhangwena.

Puleinge okwa ti ngashingeyi okwa tegelela ashike oshiputudhilo shoka shi holole kutya mboka ya taambwa nenge ahawe.
Ashike okwa ti opo a tameke moshitopolwa moka ihe ke na naanaa uuyelele wothaathaa mboka tawu ulike kutya aanona yangapi yaayelele ya taambelwa kiiputudhilo yopombanda ngaashi Unam nenge Nust.

Okwa ti ngele opuna sha moshitopolwa moka onkee ngaa omwaalu inaagu thika natango moombonge ndhoka hadhi ungauka nomauyelele ngoka.
Puleinge okwa ti aanyasha yamwe mboka yli moshitopolwa oyeya po noprograma ndjoka yokuhika oongalo noshowo oku imba omayimbilo ngoka gena omatumwalaka taga ndungike yakwawo yo nduno aniwa taya mono nduno okashona kawo hoka taya ikwatha nako opo ya hume komesho.

Okwa hokolola woo kutya ombelewa yawo ngashingeyi otayi dhilaadhila oku longitha ongundu ndjika okweenda noosikola opo ya tse yakwawo omukumo oku ilonga nuudhiginini yo ya hulithe po oku za mo mosikola.

LEAVE A REPLY

Please enter your comment!
Please enter your name here