Kansela a tanga aanamukunda sho ya hupu etale

0
62

Loide Jason

ONGWEDIVA-Kansela gwa Kalongo Laurentius Makana Iipinge okwa yambidhidha aakwashigwana yomoshikandjohogololo she moshitopolwa shaMusati noshimaliwa shooN$ 2 000 opo ya wape okulonga etale lyawo ya yande enota omumvo tu uka.

Iipinge okwa ti osha simana unene sho aakwashigwana ya tokola opo ya tsakaneke epangelo mokugongela omeya ngoka taga nuwa kaantu noshowo kiimuna yawo ngele ya fululula etale ndyoka lili popepi nawa.

Okwa ti oshimaliwa shoka a gandja otashi ka longithwa pamwe niimaliwa mbyoka ya gongelwa kaakwashigwana mboka ya tokola opo ya fule etale lyomeya.

Kansela okwa ti etale ndika ngashingeyi otali hupwa momukunda Hakuyela guli moshikandjohogololo shaKalongo.
Iipige okwa tanga aakwashigwana molwetokolo ya ningi. Okwa pandula wo Elenga enene lya Mbalantu, Oswin Mukulu ngoka woo naye a yambidhidha aakwashigwana mbaka noshimaliwa shooN$ 2 000.

Iipinge okwa endulula kutya okwa nyanyukilwa oshigwana she shika sho shi imanga kumwe etashi tokola okulonga nuudhiginini opo shi mone omeya no inaashi tegelela sigo epangelo tali shi pe shoka sha hala.

Aakwashigwana yo yene oya gongela oshimaliwa shili nawa shoka ya longitha okufuta embakumbaku opo li hupe etale ndyoka.
Shoka a ti osha pumba noonkondo nokwa hala omikunda dhimwe woo dhi kutheko oshiholelwa opo dhi longele kumwe dhi gongele dhi mone omeya ngele otashi vulika.

Embakumbaku ndyoka tali kwathele mokufula etale ndyoka olyaKambwa omunangeshefa eshiwike nawa muumbangalantu.

LEAVE A REPLY

Please enter your comment!
Please enter your name here