Olwaadhi lwayakulapo omagumbo mIitota nomoTamanzi…Omagumbo, nomashisha ga kwatwa kolwaadhi koTamanzi

0
734

Loide Jason

OTSALINDI-Aatsalindi moshitopolwa shaMusati oya dhengwa koshikungulu shoka sha hanagulapo omagumbo gawo noshowo oondunda dhokulala.
Oshikungulu shika osha holoka komatango gOsoondaha yoshiwike shika na osha hanagula po omagumbo gaali noshowo sha fike po eshisha limwe ndyoka lyali lyu udha iilya sigo okoshimato.

Egumbo ndyoka lya dhengwa kolwaadhi sigo talu fike po ondunda noshigandhi shoka sha lunguna po thiluthilu olya Titus Hango.
Hilma Nuyoma ngoka a li megumbo sho oshiningwanima sha holoka okwa ti oyali ya ondama omvula ethimbo sho oshiningwanima sha holoka ihe oya mono ashike kutya oshigandhi nondunda oya pyapo thiluthilu sho omvula ya sheka.

Ashike yamwe yomwaamboka ya tondoka onkugo oya ti omundilo gwolwaadhi ohagu fike ashike shoka gwa endela etagu dhimi.
Nuyoma okwa ti omundilo ngoka ogwa dhimi kaaguna nande ekwathelo lyomuntu oshoka aniwa omundilo gwaKalunga iha gu kwatwa .
Shika hasho oshikando shotango megumbo muka tamu dhengwa kolwaadhi, oshikando shotango aniwa olwaadhi olwa fike po omulunga omanga oshikando oshitiyali gwa fike po omugongo.
Ngashingeyi nduno ogwa fika po oshigandhi shoka sha adhika shi na iilya mbyoka ya limwa momumvo gwa ziko noshowo mbyoka yomomumvo 2015.

“ Ngashingeyi ka ndi na iitya nomatumbulo. Shila otandi pula ashike moshigwana ngoka ena uunongo wokukutha po olwaadhi ndoka a kwathele nkene tu na okushi ninga,” osho Nuyoma a ti ngaaka.
Paulus Nalisius egumbo lye ndyoka lyali lya dhikwa niipeleki ya ninga ongandjo noshowo ya longithwa oku dhengela ondunda yokulala oya hanagulwa po kombepo.

Sho Kundana a thiki po okwa adha Nalisius ta gongele iipeleki mbyoka ya pepwa po koshikungulu.
Ombinga ndjoka onene yegumbo oya halakanithwa po kombepo thiluthilu ihe Nalisius okwa ti shika itashi yi okulonga kwe nuudhiginini moshipala.

Onkee nduno a tokola okudhika natango ongandjo ye opo a shunithe ko yimwe yomiipeleki mbyoka yili hwepo konima sho ya pepwa ko, kombepo.
Nalisius okwa hokolola kutya oya adhika yeli mondunda nomukadhi Martha Johaness sho oshikungulu sha tameke.

Okwati ye okwa fadhuka po oshoka okwali a haluka ihe omukadhi okwa ti ayihe mbyoka ya holoka oya ningwa momeho ge sho oshikungulu tashi pepe.
Limwe lyomomagumbo ngoka ga halakanithwa po oondyoka lya Reinhold Shaanika ndyoka ekuma lya kuthwa iipeleki ndele nongandjo tayi halakanithwa po kombepo.

Gisel Iikuyu omukulukadhi gwa Shaanika okwa hokolola kutya ye okwa adhika ashike eli mondunda nomwana ethimbo oshiningwanima sha holoka naa shoka oshali she ya tilitha.

“Mondunda moka twali twa ondama omvula oyo ngaa ya kuthwa iipeleki ayihe. Ndele ombete yimwe ndjoka ya dhengwa koshikungulu tayi teka po thiluthilu. Otwa haluka noonkondo ihe eshito lya Kalunga kali patanekwa,” osho ati ngaaka nonkumwe.

LEAVE A REPLY

Please enter your comment!
Please enter your name here