Opolifi moshitukulwa Ohangwena otai ka ninga oyoongalele

0
127

Komutoolinghundana

EENHANA-Opolifi yoshitukulwa shaHangwena otai ka tameka oikonga yomaudife ko mekeelelo loimbuluma yokukupaula omatuwa oufiku osho tashi ningwa moitauwa ihapu moshitukulwa shaHangwena.

Ehokololo ola yandjwa komupopiliko wopolifi moshitukulwa osho Shisante Kaume Itumba, oo a tumbula edi konima eshi opolifi mOhangwena ya lopotelwa oiningwanima yokuponokela eetuwa kwa wiwila moitauwa ya yooloka ya tavakana momikunda da yooloka moshitukulwa omo. Ta yandje oshihopaenenwa shomushingi wetuwa la dengwa nomamanya pOshikunde moshikandjohoololo shaShikunde, sha ningilwa omunambelewa wetanga leameno manga a li ta di mofuka novaneumbo laye. Molwaashi okwa li kwa toka oshiningwanima eshi okwe ke shi lopota pekondeka lopUushake mondjila yokuya kEenhana moshitukulwa shaHangwena.

Oiningwanima yoludi eli oya ningwa omaufiku moitauwa yomomikunda ngaashi shopokati kOndobe nOnhuno, Endola – Okatana, Engela – Omungwelume, Oshikunde – Eenhana. Oiningwanima ya ningwa pokati ka Septeba naKotoba, opolifi oya kwata oumatyona va longa omunyonena wafa dikwao pOndobe moshikandjohoololo shaNdobe veedula dopokati ko17-20 lwaapo. Sisante Itumba ta yelifa kutya, ekwato lavo ola etifwa eshi mwene wetuwa la dengelwa momudingonoko wOndobe, nokwa ka lopota oshiningwanima kopolifi opo va pite ongula nokulandula eemhadi fiyo omeumbo omo mwa hangika omufekelwa umwe ou a ka tonga omadina a vakwao.

Omunambelewa wopolifi okwa kumaida ovadali novafilishisho vounona momaumbo vaha pitike ounona va ninge Kakombo lilifa, molwaashi oupyakadi ou owa tandavela paife moshitukulwa ashishe. Oumatyona ohava tula oinima moitauwa ngaashi outololi vakulupa, oitenda yoitaafula yopeefikola ei itai dulu kumonika komushingi efimbo loufiku.

Sisante Itumba ota kumaida ovadali moshitukulwa shaHangwena va kunghilile ounona voumati va kale hava tokelwa momaumbo ndele haku ninga oungudu popepi noitauwa va teenhena omatuwa nokwaa ningila ominyonena. Etokolo lokuninga oyoongalele tete momidingonoko mwa ningilwa oiningwanima otaku teelelwa ovakwashiwana aveshe va kufe ombinga nokudiinina omalandulafano moshiwana eshi tashi ulike onakwiiwa iyii. Opolifi oya tala kutya, ngee inai kumaida oshiwana otashi dulika eshi oumatyona vahapu tava ka shakena momafudo kuka holoke oiponga ya etifwa pamikalo edi. Omunambelewa wopolifi okwa pula oshiwana shi longele kumwe nopolifi mokukaandeka ominyonena edi.

LEAVE A REPLY

Please enter your comment!
Please enter your name here