Ya pewa oondjuhwa ya mune

0
126

Maria Namupala

OKATJALI-Ongundu yambidhidhi yomomukunda Okapopo moshikandjohogololo Okatjali oshiwike sha piti oya taamba oondjuhwa okuza komumuni goondjuhwa a tseyika nawa muumbangalantu.

Ongundu ndjika yi na konyala iilyo omilongo mbali otayi wilikwa kuWilbard Neyandje, ngoka a ti ohayi gongala omasiku ga yooloka yi ikunde nkene yena okuyambula po okukala kwawo. “Omolwonkalo yuuhupilo ondhigu moshilongo nomomidhingoloko dhetu otwali twa kwatwa kehalo nokohokwe opo tu tote po oshikunino shoondjuhwa, ndhoka tatu kala tatu munu nokutekula tseyene, tse tatu tala kutya otatu hupu nokuhuma ngiini komeho,’ Neyandje ta ti.

Okwa ti oongundu yambidhidhi ohadhi longo naantu mboka taya lumbu nombuto yoHIV oshowo mboka ya gumwa.Ohayi nyangadhala opo yi longe iilonga yadho kudhodhene, dho dhi ya yambulepo nokuhwepopeka oonkalamwenyo dhawo, dho tadhi hungathana oomwenyo nokutungathana. Neyandje ta ti ongundu ndjika oyo yimwe yomoongundu yambidhidhi ya konekwa tayi longo nuudhiginini shoka sha thiminike woo Kansela gwaKatyali, Joseph Mupetami naye a kwathele oshigwana she shoka tashi kambadhala. Aakalimo yomomukunda naa mboka ya zi pomikunda dhopuushiinda oyali ya gongala poshikunino mpoka, noku taamba oondjuhwa dhawo konyala 220. Mokutaambako oondjuhwa dhawo oya pandula Kansela gwawo ngoka oye a kwatele ayihe komeho, nokukwashilipaleka kutya oondjuhwa odha thika momake gawo, yo yedhi longithe muuwanawa wawo yene. Omunafaalama goondjuhwa mOshondo moAnamulenge moshitopolwa Omusati Farm Horizon oye a gandja oondjuhwa ndhika .

David Iileka okwa ti opoloyeka ye yoondjuhwa oya kwathela aakwashigwana oyendji, unene tuu mboka ya hala okutota po iikunino yoondjuhwa, oha talelepo omahala ogendji moshilongo noku kumika wo aakwashigwana nokuya nkondopaleka.
“Momidhingoloko dhetu omuna aakwashigwana oyendji taya kambadhala okwiiyambula po ashike oyendji otaya nyengwa molwaashoka ka ye na omadhiladhilo nomathaneko gokomeho.

Onkene onda tokola opo ndi topole uunongo mboka ndina naakwashigwana, yo ya vule okweeta po sha kuyo yene, kaaya kale owala yeli momagumbo ya mwena,” Iileka ta ti.

Okwa ti omashongo ngaashi goluhepo nokwaahena iilonga otaga kandulwa po owala uuna aakwashigwana yi imanga kumwe okuga kondjitha, nokwi imonena woo iilonga kuyo yene, nokutota po oompito dhiilonga momidhingoloko dhawo.

Okwa indile aakwashigwana mbaka ya longithe nokukwata nawa oondjuhwa dhawo, yo yedhi sile aluhe oshimpwiyu, dhi vule oku ye etela uuwanawa monakuyiwa. Okwe ya kumidha opo ye dhi pe iikulya nomeya ga gwana shi ikwatelela kuuyelele mboka ya pewa mootundi.

LEAVE A REPLY

Please enter your comment!
Please enter your name here