Yi ilonge- kidhila oshituthi shoongalo dhoJazz

0
15

Pinehas Nakaziko

Aahikingalo mboka taya ka mwenyeka noku ulika uunongo wawo poshituhti shoongalo dho Jazz, pamwe naalongekidhi, osho tuu aaholi yoongalo ndhika, oyi ilongekidhila oshituthi shika, naayihe okwa kundanwa yili pomahala.

Oshituthi shika oshitihamano nuumvo, otashi ka dhanenwa pokapale okanene moshilando, Independence Stadium.
Gumwe gwomaalongekidhi yoshituthi shika, Lydia Amutenya okwa ti oya tengeneka aatali yethike po 5 000, taya ka kala ya holoka, oshoka elanditho lyuutekete otali ende nawa.

“Iinima ayihe oya longekidhwa nale, paife otwa tegelela ashike esiku lithike opo kehe gumwe eke shi iningile,” Amutenya a ti ngaaka. Noku gwedha po kutya aahikingalo ayehe mboka taya ka nyanyudha poshiindingili shika oya holola yi ilongekidha nawa, naahikingalo okuza pondje yoshilongo oya tameka nale okuthika moshilongo okuza Etitatu ndika.
“Shika osho oshituthi sha inekelwa itaa shi ka dhimbiwa, notashi etelele omayinyanyudho ogendji, naamboka ya hala oku kala pusho naya lande uutekete wawo manga kuyele oshoka owuli poku pwapo,” Amutenya.

Big Ben, gumwe gwoomahikingalo mboka taya ka imba poshituthi shika okwa ti okwi ilongekidha okuka ulika oshitalenti she, nokumwenyeka engathithi ndyoka tali ka kala lya holoka poshituthi shika.

“Shika osho oshituhti sha simana moshilongo, oshoka ohashi tu pe oompito dha manguluka oku imba komeho gaantu oyendji, na ishewe pamwe naahikingalo yopondje yoshilongo,” Big Ben ta ti ngaaka.

Okwa tsikile ko a ti, omuhikingalo kehe ha kala a hiwa opo aka imbe koshituthi ngaashi shika, ina pumbwa oku imba okangalo kamwe nenge uyali, ashike okumwenyeka nande onuungalo wa adha pomulongo.

Aahikingalo mboka taya ka imba poshituthi shika ya za moshilongo ongaashi Erna Chimu, Lize Ehlers, Big Ben, Suzy Eises, Major 7 naWilleam Peterson.

Oshituthi osha etelela ishewe aahikingalo ya za pondje yoshilongo ngaashi ongundu yoMi Casa, ndjoka hayi imbi oongalo dho house, no yi na aa imbi yatatu. Omuhikingalo omukwayo oye Ringo Madlingozi ngoka aza moSouth Africa, nokwa tseyika noongalo dhe ndhoka dha dhenga mbanda.

Oshituthi shika otashi ka tameka pondatu yomutenya (15h00), nuutekete otau adhika kooN$ 250.

LEAVE A REPLY

Please enter your comment!
Please enter your name here