Oshikungulu sha denga omaumbo mIitota

0
245

Komutoolinghundana

IITOTA-Omaumbo e dule po 20 mIitota omukunda u li moshikandjohoololo shaUvudhiya moshitukulwa shaShana okwa ningilwa oushada kodula yeemhawe ya twila mumwe nomhepo idjuu, ya loka oSoondaxa ya djako. Ehokololo ola yandjwa koshifo Kundana kumwene womukunda Iitota Shigwedha Iindongo.

Mwene womukunda Iindongo ta holola kutya, momukunda Iitota mu na omaumbo e dule po -60 ouli kombinga youlifilo kombuwa moshitukulwa shaShana, oko kuhe na naanaa omiti. Ta weda po kutya, otashi dulika sha etifa omaumbo mahapu a nhokaulwe oipeleki yeendunda. Fiyo efimbo a popya noshifo Kundana, ke shii naanaa kutya omaumbo angapi a ningilwa oushada molwaashi efiku alishe keshe ovanamaumbo va dengwa koshikungulu ovauhala ve lipyakidila nokutoola oipeleki imwe ya tonyaunwa nokukupulwa momahalandjandja, moyana.

Indongo okwa ti, odula ya pauka lwopotundi onhi-16:00 lwaapo, oya twila mumwe nomhepo idjuu neemhawe dakula, nomhepo oya nhokaula ko eenhala doipeleki momaumbo ahapu ovaIitota. Ta yelifa kutya odula oya loka eevili dihapu inave shi mona nale pefimbo lonhemuna noya ka sheka lwopotundi omhi 19:00 konguloshi. Mwenomukunda waIitota okwa ti, molwaashi oshitukulwa shombuwa kashi na omiti, nomolwomata eemhawe a li manene unene, oimuna ngaashi oikombo oye ya kuhondama momaumbo omo mwa kunwa omiti domidile. Kakele koushada wa ningilwa eenduda doipeleki, inaku lopotwa omunhu a mona oshiponga moshikungulu eshi.

Indongo ta yelifa kutya nodula ya dja ko eshi va mwene omuloka muwa pefimbo lokulombo, odula oya temuna muKotoba ngaashi neudo. Okuwete kutya, shaashi natango oya dika oluudi lakula, ota shuulike ku na omuloka muwa onghee ota kumaida ovalimimapya va tameke okupulula diva opo va longe manga kuyele nokukala noikulya momaumbo.

Kombinga youshada okwa kumaida oshiwana shi kune omiti dihapu opo monakwiiwa ngee oikungulu tai holoka itai eta omaushada manene, ta kumaida ovatungi va longife ovatungi venowino mokutunga omatungo a kola okuyepa oiningwanima yoludi ei monakwiiwa.

LEAVE A REPLY

Please enter your comment!
Please enter your name here