Ya kumikwa ya kaleke po uuyogoki

0
54

Maria Namupala

ONIIPA-Ehangano lyoClouds Trading Enterprises ndyoka li inekelelwa okulongekidha iikulya yaanuuvu moshipangelo shaNandjokwe olyali lya longekidha omadheulo gowina, ngoka ga ningilwa pEkamuti mOndangwa.

Omadheulo ngaka ogali ga nuninwa aaniilonga mokombitha yoshipangelo shoka, noga ningwa uule womasiku gatatu. Omukuluntu wiliki gwehangano Claudia Mbura okwa yelitha kutya omolwonkalo yuuyogoki noku wu lalakanene oyali ya thaneke opo ya gandje omaudheulo ga nkene uuyogoki wu na okukalekwapo.

Mbura ta ti omwa kuthwa ombinga konyala kaaniilonga ye thike po 30, noya kala taya pewa ootundi mekwatelo komeho lyehangano lyo African Hospitality. “otwa tameke nomadheulo getu mono ya pewa ootundi nkene iikulya yontumba hayi telekwa, nkene yena okukaleka okombitha ya yela ethimbo kehe, nonkene ompungulilo yiikulya yi na okukala,” Mbura ta ti. Okwa gwedhapo kutya hasho oshikando shotango taya longekidhile aaniilonga omadheulo ngaka, nokwa uvaneke taya kala taya unganeke omadheulo ngaka opo woo aaniilonga ya nkondopekwe. Okwa yelitha kutya aaniilonga mbaka ohaya pewa omadheulo itaa ye ga futile sha.

Ngoka ali agandja omadheulo ngoka uule womasiku gatatu Eveline Amunyela okwa tothamo kutya opuna aaniilonga yamwe yomookombitha yaahena esiloshimpwiyu lyiikulya nolundji ohaya kala ya kaka nonande taya longo nokukwata iikulya ethimbo kehe.
Amunyela okwali a pula aaniilonga ya kale taya yogo oonyala dhawo manga inaaya tameka okulongekidha iikulya, naaluhe uuna ya talelapo okandjugo. Okwa ti uuna taya gandja iikulya kaavu naya kale taye shi ningi pamukalo omwaanawa, noyena ombili yokomwenyo opo aavu ya kale taya li ya manguluka noku aluka.

“Olundji uuna aaniilonga taya telekele aavu ohaya teleke owala shampa ya teleka niikulya ihayi kala ya longekidhwa momukalo omwaanawa, omwa pumbwa oku kala hamu longele kumwe ne tamu pukululathana mu wape mu kaleke po uuyogoki nomomudhingoloko goshipangelo ashihe,” ta gwedhapo ngaaka.

Okwa indile aaniilonga ya kaleke po uuyogoki nokukala aluhe taya opaleke okombitha, niikwatelwa mbyoka hayi telekelwa ethimbo alihe, ta ti ondoya nenge oongaga ohadhi eta omakokolote, ngoka ta ti ohaga eta woo oombakiteli ndhoka inaadhi pumbiwa mokombitha.
Mbura okwa ti oyahala opo ya kale naaniilonga mboka haya longekidhile aavu iikulya ya pyokoka, yo yu uviteko uundjolowele nuuyugoki osho wo esimano lyawo.Okwa uvaneke taya kala taya gandja omadheulo ngaka kaa niilonga ethimbo alihe, noku kala taya talelepo okombitha ya tale ngele omadheulo ngoka taya gandja otaga etapo ngaa elunduluko maaniilonga.

Esiku lyahugunina aaniilonga oyo tuu mboka oyali ya pewa oonzapo sho ya kutha ombinga momadheulo ngoka, noyendji yomuyo oya holola kutya oyi ilongamo oshindji, no taya ka longitha uuyelele mboka nokomagumbo gawo.

LEAVE A REPLY

Please enter your comment!
Please enter your name here