Ekondjifo loHIV/AIDS nali ndjekwe po

0
39

Nonande epangelo nomahangano ehefi opapangelo noilongo ihapu mounyuni ta i twikile nokutula eemiliona dihapu meepologalama nomomalalakano ekondjifo lombuto yoHIV AIDS onghene nghao ombuto ei ta i tandavele mounyuni, mwa kwatelwa yo naNamibia.
Sheli kolelela komivalu dehangano loiwanahangano loUNAIDS olo hali ungaunga nombuto yoHIV/AIDS mounyuni, okuya kexulilo oomudo, 2016 oshimaliwa shifike peebiliona US$ 19.1 (eebiliona N$270) oshali sha yandjwa mekwafelo lokukondjifa oAIDS moilongo oyo ina oyuuyemo inini naai ina oiyemo yopokati mounyuni.

Oilongo oyo, oya weda ko koshimaliwa osho sha yandjwa koUNAIDS mekondjifo loHIV/AIDS, ya weda ko omuvalu munene weepelesenda 57. NoUNAIDS otai tengeneke kutya oshimaliwa shi fike peebiliona US$ 26.2 natango otashi ka pumbiwa pomudo 2020 nokudja opo otaku ka pumbiwa vali shikwao sheembiliona US$ 23.9 otashi ka pumbiwa okuya pomudo 2030. Ashike nonande eebiliona neebiliona odi kale tadi pombelwa mekondjifo lombuto ei, ounyuni itau ka mona eyooloko ngeenge i tapa ningwa omalunduluko, nongeenge otaku etwa omikalo dipe dokukondjifa etandavelo lombuto.

Ehangano olo tuu olo loUNAIDS natango onghee ngaho la lopota kutya modula yo2016 aike, ovanhu vape veli pokati komiliona 1.6 novanhu eemiliona 2.1 ova kwatwa kombuto yoHIV. Mounyuni aushe ovanhu veli pokati keemiliona 30.8 fiyo opeemiliona 42.9 ovo vena ombuto yoHIV. Momudo oo tuu oo ovanhu eemiliona 19.5, ova kala veli kepango loARV.

Ashike okukwatwa koHIV okwa ya pedu neepelesenda 11, nomafyo haa etifwa kombuto yoHIV/AIDS okwa ya poshi neepelesenda 48. Nonande nee pakale pena elunduluko la tya ngaha la nyika ouwa, oimaliwa oihapu unene ya kala nokutulwa mekondjifo lombuto ei, ashike natango otai anye etandavelo layo li dje po filu filu, ile nee ngeno i monikile epango.

Eheno shili omapangelo nomahangano otaa longo, ashike opena shihapu sha pumbwa oku ningwa po.
Oinima oyo ya pumbwa okupandulwa noku nghonopekwa ongaashi ekengho lovalumenhu olo moNamibia taku hokololwa kutya Oshitukulwa shaShana noshaZambezi oya hanga omuvalufaneko wayo mOshikonga shekengho lovalumenhu otau hafifa neenghono, nota u ulike nghene oshiwana sheli longekida oku longela kumwe nepangelo mokulwifa ombuto yoHIV noku ya momilele da amenwa. Pamushangwa wa dja kouministelei wouhaku nookahewa kouministeli moilonga oo wa li wa yandjwa oshivike shadja ko pefimbo lomutumba oo wa li moWindhoek una sha nekengho lovalumenhu, ota u ulike kutya, opologalama oyo ya kwatelwa komesho kehangano lo I-Tech Namibia olo lili koshi yOuministeli wOuhaku moitukulwa ei ivali oyali ya tengenekelwa okukengha ovalumenhu 3500 moZambezi, novalumenhu 4500 moshitukula shaShana. Eshi osha ningwa pokati komudo woshimaliwa oo hau tameke mefiku 1 Kotoba 2016 fiyo omo 30 Sepeteba 2017.

Ehongo lounona nalo ola pumbwa okunghonopekwa opo ounona vahongwe okuli keelela kombuto omanga vanini tashi pitile mehongo, meefikola. Mongaha moNamibia ope na eemhata pokati kouministeli wehongo novakwangeleka, ovo ve udite kutya okulonga ounona ehongo li na sha nomilele, okulonga ounona oipala nokuva twa omukumo op ova ye moixulo pefimbo lounona. Ashike eshi osha puka, ounona ova pumbwa okuuda ko manga va nini, opo eshi tava ka kula notave ke lihanga pefimbo va taalelwa komayeleko a nyika oixulo, otava dulu okuninga omatokolo eli mondjila oku anya ile okuya moixulo ile nee hano okuli amena shaashi ove na eudeko nouutile kutya omilele inaadi longekidwa otadi dulu oku va etela shike.

LEAVE A REPLY

Please enter your comment!
Please enter your name here