Ethigathano lyoVolleyball mOndangwa ehuliloshiwike ndika

0
21

Shipi Elago

Ondangwa-EeKalaba ndhoka hadhi dhana moliha yoFar North Volleyball League olyomakaya ndjika ota dhi ka ya methigathano lyadho lyokomumvo mOndangwa hali unganekwa aluhe kehe omumvo kehangano lyokatanga kokomake moNooli.

Omupopiliko gwehangano ndika Tinaye Agoro okwa ti ehuliloshiwike ndika shiti ota ka tekela mbundje mOndangwa sho oosipana dhaamati naakadhona tadhi ka kuthombinga muudhano mboka wa kala wa tegelelwa koyendji moNooli.

Ethigathano ndyoka tali dhanwa oshikando oshititano ngashiingeyi konima sho lya li lya totwa oli li omweelo gwo ku pitila oku ya kethigathano lyooKalaba dhomanyakwa moNamibia ndyoka ha li kala ko pehulilo lyomvula omumvo kehe.

“Nando uuyelele owindji owu li nale wa gandjwa koosipana paumwene otatu kunkilile oosipana opo dhi etelele N$ 500, yomayishangitho osho wo aahikihiya ye li yaali mboka taya ka longithwa moku wilika uudhano, osipana ndjoka ta yi ka ndopa oku etelela aahikihiya ye li yaali otayi ka pewa egeelo enene kolutu okuzilila kehangano lyoVolleyball,” Tinaye Agoro a londodha.

Omusindani gwotango ota ka toolapo okapandi ko N$ 2000, omutiyali N$ 1500, nogwahugunina N$ 1000.
Okwa ti kakele kotonamende ota ya ka kala wo yena oshituthi sho ku gandja omapapa sho komumvo okugandja omapapa kwaamboka ya longa nawa momukokomoko gwokatanga kokomake gwo 2017.

“Ota shi kala oshikando shotango uudhano mbuka tawu tsakanene negandjo lyomapapa nonkene shika oshe u pa oshiviha, omapapa ota ga ka gandjwa konima yuudhano,” Tinaye ta tsikileko.

Pethimbo Kundana a li moonkundathana naye okwa ti ka ya li natango ya totha mo kutya uudhano mbuka otawu kadhanenwa pokapale keni mOndangwa ashike okwa ti pokati kOndangwa Tennis Court no North Cote opo taya ka kutha okapale kamwe.

Onkene ota indile opo aakalimo yomOndangwa ya kale ya holoka momiyalu odhindji opo ya mone omayinyanyudho kaa kuna we.
Ota indile woo aavali opo ya ete uunona kokapale opo ya wa pe oku ya hokitha uudhano mbuka.

LEAVE A REPLY

Please enter your comment!
Please enter your name here