Iikondo yimwe inayi ya komauliko giipindi gaHelao Nafidi

0
35

Maria Namupala

HELAO NAFIDI-Omauliko gIipindi gokomumvo gaHelao Nafidi nuumvo oga li ga hepa aauliki yiipindi. Unene tuu sho iikondo yimwe yepangelo osho wo yopaumwene ya li inaayi holoka pugo.

Omauliko omatimu-longonambali gomondoolopa ndjika oha ga kala gu udha shito, ihe nuumvo aaniikondo ya yooloka yopapangelo nenge yopaumwene, inaya holoka momiyalu ominene ngaashi haye shi ningi shito.

Omahala ogendji ogali geli owala, nonande mwali muna okukala aa uliki yiipindi ya yooloka. Oyendji yomaapindiki oya li aanangeshefa aashona noyopokati, unene mboka haya ulike iilikolomwa yawo ngaashi iikulya yopamuthigululakwalo na yilwe oyindji.
Omukokoli Presidente Omundohotola Sam Nujoma oye a patulula pambelewa iipindi mbika yokomumvo. Nujoma moshipopiwa she okwa pula aanangeshefa aashona ya kale aluhe taya kutha ombinga momauliko giipindi ngoka ta ti oga totwa po nelalakano lyokugandja ompito kuyo ya ulike iilikolomwa yawo, yo taya pindike noku paathana omayele ngoka ga pumbiwa mokati kawo.

“Otandi pandula aanangeshefa aashona mboka oyo ya kwatela po eliko lyoshilongo, nopompito mpano onda hala okuya tumbaleka nokuya dhimbulukitha kutya oshilongo ohashi tungwa po uuna aantu taya longele kumwe, notaya lalakanene shoka shoopala noshi li mondjila,” Nujoma ta ti ngaaka.

Ta ti okuuvite etumba molwaashoka okwa kundana elelo lyondoolopa ndjoka tali longo muukumwe mokuyambula po noku kwashilipaleka kutya oondjodhi dhoshilongo ngaashi NDP5 No Vision 2030 odha tsakanithwa, noku eta omahumokomeho ngoka ga pumbiwa unene moshilongo nomoondoolopa adhihe.

Nujoma ta ti nonande elelo lyondoolopa lya taalelwa komashongo ga yooloka, otaya pondola uuna aakwashigwana na yo taya kwathele elelo nepangelo.

“Ondali woo nda tseyithilwa kutya iipindi yotango mondoolopa ndjika oyali ya ningilwa kohi yomuti, nonena otuli metungo enene lyopashinanena, shika osho shimwe shomiilalakanenwa yetu, onda hala okukumika aanangeshefa ya kwathele elelo lyondoolopa mokweetapo omahumokomeho ngoka ga pumbiwa moshilongo ashihe,” ta tsikileko ngaaka.

Omunambelewa melelo lya Helao Nafidi Selma Kapembe okwa yelitha kutya oya yakula aayuliki yiipindi yeli 164, tati omauliko giipindi giihanena oondoolopa odhindji moshilongo ogo ga eta omwaalu gwaauliki yiipindi yaza kiikondo ya yooloka gu kale omushona noonkondo.

Kaino Kakunde, gumwe gomaauliki yiipindi ngoka twa kwatathana a ti iipindi yonuumvo otayi yemateke okuyelekanitha naambyoka yoomvula dha pita, ta ti nonande tayi ende kashona ye ota tsikile nokuulika iilikolomwa niilongwamo ye, nokukumika aanangeshefa ya kuthe ombinga miipindi.

LEAVE A REPLY

Please enter your comment!
Please enter your name here