Ino sithwa ohoni sho olutu lwoye olunene …zala owala iikutu yoye yomoode

0
267

Komutoolinkundana

Windhoek-Okukala nolutu olunene itashi ti kutya ito vulu okuzala iikutu yoye yopashinanena. Iinima otayi lunduluka. Utya ngashingeyi ope na omishangwa kointernet tadhi gandja no dhi lile po okundungika mboka ye na omalutu omanene nkene taya vulu okwi izaleka yo opala nosho wo mpoka taya vulu oku ka landa iizalomwa yawo. Olundji aantu yomalutu omanene aakiintu naalumentu ka ye na einekelo mwene omolwomalutu gawo, oyi itaala kutya opo omuntu wu kale wo opala owu na okukala wu na okashendjelutu. Ndele shika kashi shi shoshili.

Kaagundjuka otuna oshiholelwa shomuuliki gwiizalomwa omuAmerica Dexter Mayfield, ke shi owala omodela ndele oye wo omudanisi nomudhani gwiinyandwa. Nolutu lwe olunene lela. Ihe oha vulu okundanisa noku ulika iikutu. Okudanisa okwa longa na Justin Bieber, Katy Perry na Jennifer Lopez. Omunamimvo 32 omvalele ya Dallas, Texas, omasiku ngaka okwa ulikile omathano ge mwene poshiithanene shokuulika iizalomwa mo Los Angeles moka na ye a li a ulike iizalomwa yaantu ye na omalutu omanene. Nonando oha ulike uudha einekelo mwene, okwa zimine kutya oku enda kwe kwotango okwa li kwe mu tilitha.

Popepi natse moSouth Africa omu na aanangeshefa mboka taya longo niizalomwa yopethimbo yaantu mboka ye na omalutu omanene unene tuu aakiintu. Gumwe oha ithanwa ‘Mobu by Mello’ ngoka ha hondjo noku konda iizalomwa yaakiintu yomalutu omanene. Omukondi nguka Mamello Moases okwa mono edhiladhilo ndika molwashoka naye omunene molutu.

“Onda kala inaandi hala okuholoka ashike nda fa omuntu gowala, ihe onda hala wo okuzala iizalomwa yili nawa noyopethimbo na ongomuAfrika ondi shishi kutya otandi shi vulu ethimbo alihe. Shika osha kala ngaaka okuza mpoka kutya otandi vulu okwiizaleka mwene noku imonena wo omaalaka moka tandi vulu okulanditha iizalomwa mbyoka,” osho a ti.

Pethimbo ndika nena iizalomwa ye ohayi landithwa nomoositola dhimwe dhiizalomwa okuya sigo okiilongo yokokule ngaashi China, England naAmerika. Omwedhi gwayi Moases okwa li a ulike iikutu ye mo Brussels, Belgium.

Na ka sha li oshipu okulanditha iikutu ye koEuropa naAmerica. Moases ota ti petameko omahangano omanene oga tindi iizalomwa ye
ongomukondi ga ti okukonda kwe ka ku li nawa naa zali yiizalomwa aagundjuka oshoka mbyoka ha yo izalomwa ya hala. Oye mu lombwele kutya omukondelo gwe ogwa fa gwa nuninwa aakuluntu.

Opena wo ishewe ehangano limwe lyiizalomwa mo South Africa hali hondjo oohema dhaakiintu mboka ye na oonto oonene. Aahondji yiizalomwa mbika yaali oyo Bridget Pickering na Ludwig Bausch mboka ya toto po ehangano lyawo lyedhina Ruff Tung.
Oya ti oya eta po ongeshefa ndjika yiizalomwa yopethimbo ya nwethwamo kaakiintu yoshili mboka haya adhika taya ende momapandaanda ashike ngaashi omuntu kehe.

Oya li ya hala aakiintu yomalutu goludhi ndoka ya kale wo ya pandula nkene yo ya shitwa noku kala yu uvite nawa kombinga yomalutu gawo.

“Otwi itaala kokula omuntu wu uvitile eholoke po lyoye neiyuvo ewanawa,” osho aahondji mbaka yaali ya ti.
“Tse otwa kumikwa oopelsenda 100 kaakiintu mboka hatu zaleke na ohatu ya hondjele iizalomwa shi ikwatelela kwaashoka yo ya hala,” osho omuhondji gumwe a ti. Oya odheka aakiintu yomimvo 28 sigo 40 mboka ye na omalutu omanene nolundji ohaya kala yaa uvite nawa kombinga yomalutu gawo.

“Ohatu longitha omalwaala nomanduluko getu nawa okuopaleka omutungilo golutu lwomukiintu. Omihondjelo dhetu ohatu dhi longele kuukwatya womuzalekwa kehe opo iihondjomwa yetu yi ngushupaleke omuzali gwayo kehe,” osho ya ti.

Oya ti oya ndhindhilike kutya oositola odhindji kadhi omizalo dhoonomola dhaakiintu yomalutu omanene nenge mboka ye na oonto oonene. Onkene yo ohaya hondjo iizalomwa yoonomola sigo opo milongo 46/48 “Tse otwa kumithwa sho aakiintu yomalutu omanene nenge ngoka ga gooyolwa nawa kaayena ehogololo olindji moongeshefa dhiizalomwa, naashika osho she tu undula opo tu pe aakiintu ayehe iizalomwa mbyoka yo ya panda mwa kwatelwa wo naamboka ya viha taya landa iizalomwa mbyoka koondando wo dhili nawa,” osho ya ti.
“Ondjokonona yomalanditho getu oya ulike kutya oonomola dhetu okuza po 38 (XL) no 40 (XXL) odho hadhi landwa mo tango ,onkene otwa tsikila oku hondjela mbaka yomalutu goludhi ndoka. Omihondjelo dhetu odhe eta puuyelele aakiintu mboka ye na ompumbwe okuzala iizalomwa ya yooloka ndele omanga tse twali inaatu ya mo mo maalaka mbaka oya li nuudhigu okuhogolola shoka ya hala,”aahondji mbaka osho ya popi. – Lya kuthwa moshifo TimesLive & Yahoo News

LEAVE A REPLY

Please enter your comment!
Please enter your name here