Medipark FC a sindana po oliha nekopi lyaDr Iithete

0
26

Shipi Elago

ONGWEDIVA-Ehuliloshiwike lya ziko Ongwediva Medipark FC ya li ya sindana po ekopi lyomuNdohotola Shali Iithete ndyoka hali dhanwa omumvo kehe koosipana ndhoka ha dhi kuthombinga moliha yoSocial ya Medipark.

Uudhano mboka wa kala wa tegelelwa koyendji owa li wa dhanenwa mokapale kosikola yopombanda yaMweshipandeka mOngwediva na owa li wa nana aatali naaholi yuudhano okuza koombinga noombinga.

Katima United okwa li a toola iitsa konima sho Old Mutual a li a ndopa okuholoka pethimbo, onkene Katima United okwa li a mono okatekete koku ya kedhingoloko lyalandulako inaa thanga nando olyo etanga limwe.

Uudhano uutiyali wesiku owali pokati kenyakwa lyuudhano mbuka lyomvula ya ziko Ongwediva All Stars, opamwe nomusindani gwoliha yoSocial league gwo 2016 UNAM Staff Team, mbaka oya li yi ithigi othika mokapale 0-0 na All Stars okwa li a pondola okusindana po uudhano mbuka 3-2 koopelenti.

Uudhano pokati kaNew Media na Mweshipandeka inawu dhanwa oshoka osipana yaMweshipandeka oya li yi na omazepo onkene New Med okwa li a likola oopente oshali nokuya wo kedhingoloko lya landula ko.

Katima United okwa li a shuna mondambo nOngwediva All Stars moka shiti a li a tekele mbundje oshoka All Stars okwa li a tula ko ekumba konima shoka she etitha opo uudhano mbuka wu ka kale wa dhanwa 0-0 ashike Katima United okwa li a dhenge mo All Stars 3-0 koopelenti, nokuthiga All Stars montsi, nando All Stars okwa li ena ondjala yo ku galula ekopi ndyoka ya li ya sindana omvula ya zi ko shika ina shi ka ningwa we.

Medipark FC okwa li iifola mondambo a taalela endangalati lya New Med naampaka opwa li puna shiti ta tekele mbundje oshoka kapwali nando omwa li ta tumbu mukwawo.

Oosipana ndhika mbali odha li dhi ithigi othika 1-1 mokapale na oya li ya yi kokatomeno koopelenti hoka Medipark a li a yi ko ena omukwati omutiyali ngoka a li a lungundja shokambishi na okwa li a kwata mo omatanga agehe gatatu ngoka New Med a li a thanga oga li ga yi momake gwomukwati gwe omanga ye a li a tula mo omatanga ge gatatu, shoka sha etitha opo a sindanepo uudhano mbuka noopelenti 3-0.

Edhingoloko lyahugunina lyuudhano mbuka olya li pokati ka Medipark naKatima United , kehe gwumwe okwa li tuumbile muuta we, Medipark okwa li ta ponoka oshiponga ta pukululwa pokoola yaKatima United ashike United okwa li a tula ko ekumba konima na osha etitha opo uudhano mbuka wu kale 0-0 pokahiya kahugunina noku thiminika ekopi ndika opo li ye koopelenti oshikando shotango konima sho lya li lya totwa. Ashike oopelenti nadho ka dhali tadhi nuwa omeya nando lwahugunina Medipark okwa li a pondola oku sindana nookoola 4-3 noku ninga enyakwa epe lyuudhano mbuka lyo 2017.

Medipark okwa li wo a pewa ekopi lyuunyakwa woliha olyomakaya ga zi ko na okwa ningi osipana yotango okusindana po omakopi ngaka agehe oshita muule womvula yimwe.

LEAVE A REPLY

Please enter your comment!
Please enter your name here