Moshitila Mwa Z’Ondjupa: Okutula oondando kiilandithomwa

0
55

Mokungeshefa omu na iiholekwa oyindji. Nandi ku lombwele po itatu yomuyo mbyoka ndi shi nawa. Oshiholekwa shotango osho shika kutya, aanangeshefa oyendji oya kala taa nyengwa komwaalu, ano ihaa longo nando nomwaalu ngu gwolelalela.

Oyendji yomaanangeshefa sho twa kala tu na oositola dhi li pamwe, ano dhi li uushiindathana, ohashi vulika owala omunangeshefa ta tumu omuntu e ye a tale ekende lyomeya sho hali kotha mositola yandje. Mpono opo pwa li nduno pu na uuposi uunene mpo.Nandi shi yelithe, ngashi tashi landula: Ethimbo limwe ekende ndino pamwe onde li landa ashike[i] mositola yontumba, nenge pamwe onde li landa[ii]moholosaila, nenge pamwe onde li landa [iii] mofabulika.

Ondando yomositola yontumba oya yooloka kwaandjoka yomoholosaila, yo ondando yomoholosaila oya yooloka kwaandjoka yomofabulika.
Omuntu ke na nduno owino kutya ondando yomofabulika oyo yi li peviivii koondando adhihe, ya landulwa kwaandjoka yomoholosaila, yi li pombanda kashona, opo ihe ondando yomositola yontumba. Ondando yomositola yontumba oyi li pombanda koondando ndhiyaka mbali: kwaandjoka yomofabulika nokwaandjoka wo yomoholosaila.

Omunangeshefa omukwetu ke na wino yasha kutya mwene gwofabulika okwa tula ko nale iihohela kekende hoka. Ondando ndjoka oyo ondando yotango yekende ndyoka. Mwene gwoholosaila sho a landa ekende olyo tuu ndyoka kofabulika, naye moku li landitha okwa tula ko iihohela ye.

Ondando ndjoka oyo ondando ontiyali yekende ndyoka. Ekende olyo tuu ndyoka ngame omunasitola tandi li landa moholosaila kondando ontiyali, e tandi tula ko ondando yandje.

Ondando ndjoka ngashingeyi ya ningi ontitatu yekende olyo tuu ndyoka.
Omulandi gumwe te ya te li landa mositola yandje, ye e ke li landithe, nena ota ka landitha ekende ndyoka kondando ontine. Ondando ontine, oyi li pombanda noonkondo.

Ethimbo limwe otashi vulika ekende, nde li landa kofabulika kondando yotango, omanga mukwetu pamwe okwe li landa koholosaila kondando ontiyali.

Ngame sho tandi ka tula ko ondando yandje oyi na okukala ya fa yoholosaila, hoka a landa a ekende lye. Natu tye pamwe ngame ekende onde li landa kofabulika kiithilinga ine, ngame tandi gwedha ko iihohela yothilinga, nena ekende ndyoka otali kala li na ondando yiithilinga itano.Mukwetu lye okwe li landa koholosaila kiithilinga itano, nena oku na oku li landitha kiithilinga ihamano, nenge nokuli kiithilinga ihamano nospenitha.

Omunangeshefa omukwetu nda zi nokuhokolola ngele okwa holele ndje a hala ekende e li landithe kombiliha kondando ya fa ya ndje, nena otashi ti iimaliwa mbiya a gandjele koholosaila oyo owala ta pula natango nakulanda, ndele ye ina mona nando osenda yasha yontanitho.

Ngame ondi uvite kutya kashi li nando mondjila okuya mongeshefa yamukweni wu ka tale kutya iinima ohayi kotha ingapi, ngoye kuu shi mpoka eyi landa.

Omukalo gwokungeshefa gu na ondunge, okutala kiihohela mbyoka to mono. Ino yalula, kutya, ngele
Aupa okwa tula ko iithilinga itano koshinima[kekende], oku na okukala owala a gwedha ko othilinga yimwe. Ndishi oongeshefa dhetu odhili uushiinda, ngame nangame othilinga owala yimwe tandi gwedha ko. Koneka kutya, oto ikanitha ngoye mwene, ngele oho ka tala owala ondando kuAupa, ndele kiihohela huno ino dhiladhila ko.

Omunangeshefa ngoka ha longo nomwaalu gwokolela , ota ka dhimbulula kutya paushili na gwedhe ko osipenitha kiithilinga itano, ngele ina hala a ninge ondilo unene, opo a mone ontanitho yosipenitha.

Shika osha hala okutya, kala wu na oondunge dhokutala, ino fa ngoka a ka tala ondando kositola yamukwawo, e ta mono ko ekende tali landithwa kiithilinga itano, ndele naye osho te ke li landitha.

Ondunge yi li hwepo oyo ndjika kutya, oshiwanawa wu konge ekende ndyoka mpoka hali landithwa kondando yokolela, ano kondando yokofabulika, ngoye to tula ko ihe nduno ondando yopevi ngaashi yakweni , shi vulithe to ke li landa koholosaila, ngoye to kala ino mona iihohela/ontanitho yasha, lyo nethigathano nayakweni otali ku dhipaga po.

Oshiholekwa oshitiyali, osho elongitho lyoopelesenda. Aanangeshefa yamwe kaye shi nkene oopelesenda dhiihohela hadhi longwa nadho.
Pethimbo limwe oto adha oopelesenda dhiihohela omuntu e dhi ninga odhindji , ano dha londa sha pitilila.

Omukalo gwa tya ngaaka gwokulondeka oondando pakutula ko oopelesenda dhiihohela odhindji kiilandithomwa, ohagu tidha po aalandi. Pethimbo limwe, oto adha omunangeshefa ondando ye e yi tula ishewe pevi unene, ye ke shi wo kutya aalandi mboka haye ya okulanda kongeshefa ye oye thike.

LEAVE A REPLY

Please enter your comment!
Please enter your name here