Namibia a pewa oomilliona N$435 okukondjitha HIV

0
183

Omutoolinkundana

Windhoek-Namibia okwa koleke elundululo meuvathano lyomumvo 2007 pokati ke nepangelo lyaUSA okugwedha oomilliona ooN$435 dhiimaliwa hayi zi moshiketha shedhina PEPFAR opo yi kwathele mokukondjitha ombuto yoHIV/AIDS.

Iimaliwa otayi kwathele epangelo lya Namibia oku adha omathaneko galyo ngaashi ga ndjandjukununwa mOndungethaneko Yeyokomeho Lyopashigwana Ontintano [NDP5]. Ndjika oya ulike kutya osha simana okutunga oshigwana shi na ontseyo sho ishewe oshindjolowele, oku endeleleka ehumokomeho montseyo yaantu moshikondo shuundjolowele noku tala koompumbwe dhiitungomwa yopaundjolowele.

“Nonando Namibia ngaashi ashike iilongo yomUumbugantu wAfrika, okwa gumwa koHIV/AIDS nayilwe mbyoka hayi endele pamwe nuuvu mbuka, oshilongo osha katu oonkatu dhili nawa moku shonopeka etaandelo epe lyomukithi nguka,” osho Okommissi yOmathaneko gopashigwana ya popi oshiwike shika ya koleke shoka sha ningwa po sigo oompaka.

Namibia oku na ondjokonona ombwaanawa moku andjaganeka omiti dho-kukondjitha HIV moshigwana osho wo oku adha oyendji nomiti ndhika moshigwana naashika osha shonopeke uuwinayi mboka HIV/AIDS a li ta vulu okukala a ningila oshilongo pankalathano nopamahupilo.
Omiyalu otadhi ulike kutya oshilongo osha shonopeka lela omaso gaakiintu noshowo gaanona opo ya valwa, omanga ngoka gaanona aashona naamboka ye li kohi yomimvo ntano nago oga shuna pevi. Emoniko lyombuto yoHIV/AIDS mokati kakiintu yeli momategelelo nalyo olya shuna pevi okuza sho lya li pombanda lya thikama pooperesenda 22 momumvo 2002 nokushonopala sigo opooperesenda 16,9 mo 2014. Okuza mo 2010 ekwathelo lyeyokomeho okuza kepangelo lyAmerika olya kala lya palamena ekondjitho lyomukithi nguka, mekwathelo lyehangano lyomakwatho gopondje yoshilongo shoka lyedhina USAID.

“Iilonga mbika oya kwatelamo okukonakona aantu ombuto HIV noku ya panga osho wo omikalo dhoku keelela etaandelo lyombuto ndjika, okunkondopeka ontseyo yaaniilonga moshikondo shika osho wo omainyengitho giipumbiwa,” osho NPC a ti.
“Ayihe mbika oya simana opo Namibia a vule oku adha omalalakano goUNAIDS go 90-90-90. Shika otashi ti oopersenda 90 dhaaNamibia tadhi lumbu nombuto dhi kale dhi shishi kutya odhinombuto. Operesenda 90 dhaamboka ye na ombuto dhikale kepango nooperesenda 90 dhili kepango dhaa kale tadhi vulu okutaandeleka ombuto ndjoka kuyalwe.

“Uuna elalakano ndika lya adhika nokukalekwa po nena uuvu woHIV otawu ka talika wu li kohi yekondololo moshilongo.Namibia okuli popepi noku adha elalakano ndika,” osho NPC a hokolola

Sho a popi pethimbo euvathano ndika lya kolekwa moVenduka, Minista Yeyokomeho nOmathaneko gopamahupilo Tom Alweendo okwa ti: “Opu tu adhe omategameno getu geyokomeho otuna okusoshimpwiyu kutya ookuume ketu mwaashika oya longa sha sholela okushonopeka omashongo ga taalela eyokomeho lyetu.”

Minista Alweendo okwa pandula epangelo lyAmerika molweyambidhidho koshikondo shuundjolowele.
Pahokololo lyOshikondo shUundjolowele kombinga yehupo lyaanonalyomumvo 2014 olya ti, HIV/AIDS oya li yi na mo sha momaso geli 3, 610 omumvo ngoka.

Ompumbwe yoondohotola oshowo aayakuli yalwe yopaunamiiti inayi kwathela Namibia moku kondjitha etaandelo lyombuto ndjika.
Momumvo 2016 oshikondo shUundjolowele osha tseyithile kutya konyala aaNamibia 214 956 oya li taya lumbu nombuto yo HIV, oma 17 000 gaambaka oyo aagundjuka ye li pokati komimvo 10 sigo 19. Konyala 42 500 gaamboka ya monika ombuto oya li ya taambwa okupewa omiti dhepango lyoHIV ndele mbaka kaya li natango ha ye dhi pewa momumvo 2016.

Omwaalu 214 956 gwaamboka ye na ombuto, ooperesenda 68 odha li hadhi taamba omiti pahokololo lyuuministeli mbuka.
Ekonakono lyo HIV mokati kaakiintu aasimba olili wo pombanda, naakiintu yooperesenda 95 oye shi mpoka ya thikama kombinga yomukithi nguka, omanga ooperesenda 90 dhaamboka ye na ombuto dhi ishangitha mopolohalama yoku gamena aanona yawo mboka inaa valwa ya kwatwe kombuto ndjoka.

Omushangwahokololo gomumvo 2012 kombinga yoHIV ogwa ulike kutya aantu 27 000 oya li mopolohalama ndjika yokukeelela aanona ya pewe HIV okuza kooyina mboka ye na ombuto, omanga yamwe ina ya ka pangwa ngaaka nonando epangelo olya longo neitulemo opo aakiintu ya vale aanona yaana ombuto yo HIV.

LEAVE A REPLY

Please enter your comment!
Please enter your name here