Oshipala shomaudhano ehuliloshiwike ndika

0
23

Shipi Elago

Ongwediva-Ehuliloshiwike ndika omaudhano gokatanga kokoompadhi gooKalaba oge li manga mokafudhepo sho aadhani oyendji taya shuna kiilongo yawo hoka ya yambukile opo ya ka kuthe ombinga mokaliindeli kopayigwana koosipana dhopashigwana dhiilongo yawo.
Iilongo oyindji ota yi ningi sha namutango okuya kekopi lyuuyuni ndyoka ta li ka kalako omvula ta yiya koRussia onkene uudhano wehuuliloshiwike ndika ka wushi okupitilila po omuntu.

Meni lyoshilongo:
Dr Hage Geingob Cup:
Osipana yokatanga kokoompadhi yoBrave Warriors ota yi ka ya mondambo nosipana yaZimbabwe ngula pokapale ka Sam Nujoma Stadium moVenduka okukondjela ekopi lyomuNdohotola Hage oshikando shotango konima sho ndika lya kala ha li dhanwa kookalaba dhaNambia na South Africa. Uudhano mbuka otawu ka tetekelwa kuudhano woosipana dhaakadhona Baby Gladiator no Brave Gladiator. Meni lyoshilongo ota mu ka inyenga wo ekopi lyOm`chain Annual Soccer tournament, ndyoka ta li dhanwa koosipana ndhoka hadhi dhana kohi yelelo lyOmusati NFA, ekopi ndika olya kwashilipalekwa komuhiki- hiya omukulu eshiwike nawa moNamibia nopondje omusamane David Shaanika , nuudhano mbuka otawu ka dhanenwa pokapale kaTsandi Sport Stadium ongula yanakwasha.

Mu Africa:
Ospana ya South Africa oyi na natango ompito yokuya kekopi lyuuyuni omvula ta yi ya ashike ompito ndjoka ena otayi yelekwa naNgamelo ta piti meyulu lyonane oshoka okwa tegelelwa opo a ka sindane po omaudhano ge agehe ngoka gahupa ko noshilongo sha Senegal shoka ngashiingeyi osho shi li pombanda yongundu yaD omanga South Africa eli pevi niitsa ine.

Burkina Faso na Cape Verde oya kuutumba kiitsa ihamano kehe gwumwe ashike yo oyena ko ashike uudhano wumwe na ota ya vulu ashike oku adha iitsa yopombanda yithike piitsa omugoyi, naashika osha tula ompito yawo yokuya kekopi lyuuni moshiponga, oshoka ngele South Africa okwa sindana omaudhano ge agehe na Senegal ota ka mana e na iitsa 10, omanga Senengal okwa pumbwa ashike iitsa iyali muudhano wawo na South Africa. Uudhano uukwawo oomboka ta wu ka kala pokati komandangalati gaAfrica Morocco na Ivory Coast , iilongo mbika oyi na ko ashike uudhano wumwe mboka ta ya kiitaalela, iilongo mbika oyi li yiilandula pombanda yoshitaafula shongundu ya C moka Morocco oye eli pombanda niitsa 9 omanga Ivory Coast a landula mo niitsa 8.

Ivory okwa pumbwa oku dhenga Morocco opo a ye kekopi lyuuyuni omanga Morocco a pumbwa ashike oshitsa shimwe, Iilongo yilwe moongundu ngaashi B Nigeria okwa ninga nale oshilage okuya kekopi lyuuyuni, omanga Egypt mongundu ya E naye okwa ninga oshilage okuya kekopi.
Mongundu ya A Dr Congo ota galikana opo Tunisia a dhengwe kuLibya ye ta sindana uudhano pokati ke naGuinea ashike okuna okusindana nookoola ndatu monola nenge dhivule po, opo ashike ta vulu okuya kekopi lyuuyuni ashike shika ota shi kaningwa owala ngele Tunisia okweetha a dhengelwe megumbo kuLybia.

LEAVE A REPLY

Please enter your comment!
Please enter your name here