Oshituthi shoongalo dhoJazz oshali nawa

0
19

Pinehas Nakaziko

Windhoek-Okwa li esiku nongulohi yomainyanyudho kaakunawe ehulilo shiwike lya piti, sho aakalimo yomoVenduka yali ya dhana esiku lyoongalo dhoJazz, pokapale ketanga koIndependence.

Esiku ndika lyali lya longekidhwa noku etwa po kelelo lyaVenduka, olyali lya nana konyala ongundu onene yaaholi yoongalo dhoJazz. Kakele kiikulya niikunwa mbyoka ya li ya longekidhwa nawa, aahikingalo okuza meni nopondje yoshilongo oyali ya hwahwameke nonkondo, mpoka kehe gumwe a zileko a nyanyukwa nokwa vululukwa nawa. Inapu ningwa nando omapiyagano gasha, na ayihe oye endele nawa.
Oshituthi shika oshitihamano oshali sha etelele aahikingalo aaSouth Africa Mi Casa na Ringo, mboka oyo yali aahikingalo aanene moshiluku shika, pamwe nokakadhona okaNamibia Suzy Eises, hoka ka tseyika nawa onga dhingi moshilongo ashihe ngele tashiya poku imba oongalo dholudhi nduka.

Mi Casa ongundu ndjoka yi na aa imbi yatatu, noyali ya nyanyudha noonkondo sho yali ya imbi dhimwe dhomoongalo dhawo oompe. Moongalo muka omwali mwakwatela ongalo Jika, Chocolat and No Body. Omu imbi omunene mongundu ndjika a tseyika nawa J Something okwa kala noku yolitha engathithi ndyoka lyali lya holoka niiyolitha ye.

Okwa li ishewe a longo mboka yali ya holoka nkene aantu ye na okundaanisa oongalo dhawo.
Ringo ngoka a tseyika nawa dhingi moku imba okwa li eya pe mo moongalo dhe dhonale, moka ali ishewe a imbi ongalo ye Sondela, ndjoka yali yandaaniswa nawa. Oondigolo adhihe okokapale dhali tadhi uvikilwa.

Ngaashi sha kala omukalondjigilile, Suzy Eises naye oshikando shika okwa li a kuthako oongaku okugandja omainyanyudho ngoka gakwata miiti, sho a li a imbi ongalo Harambee. Okwa li ishewe a imbi oongalo ndhoka dhaahikingalo yopondje yoshilongo ngaashi Bruno Mars na Luis Fonsi, tedhi imbi nenkuma lye.

Big Ben okwa nyanyudha sho a imbi oongalo dhe dha adha pu ntano, manga inaa manitha nongalo ndjoka ya kala yiholike yedhina Moro Moro.

Nonando Erna Chimu okwa li a tseyitha kutya ye kali u uvite nawa, okwa kambadhala oku ulika uunongo we, noongalo ndhoka dhili melaka lyoshiDamara. Lize Ehlers naye osho eshi pondola oku imba oongalo dho Jazz, ndhoka dhali dhanuninwa esiku ndika. Okwali ishewe a imbi mbali dhoomoongalo dhe oku za moalbuma ye ndjoka ompe yedhina Heal.

Oongundu ookwawo dhoJazz Major 7 naWilleam Peterson nayo oyali ye shi pondola okunyanyudha aayenda poshiindingili shika, sho yali yapatulula oshituthi nomayinyanyudho kwaana we.

LEAVE A REPLY

Please enter your comment!
Please enter your name here