Ovanhu 641 va fila moiponga yomatuwa

0
48

Omutoolinghundana

ONGWEDIVA-Ovanhu 641 ova fila moiponga yomatuwa okudja muJanauli 2017 fiyo oshivike shotete shaNoveba neudo. Ouyelele owa yandjwa komunambelewa koshitukulwa shomapukululo mehangano lokufutila ovanhu ovo vaninga oiponga meehauto [MVA Fund], Victoria Amutenya.
Ekunghililo eli Amutenya okwe li ninga eshi kwa didilikwa unene oiponga yomatuwa ikenyeneka moivike okutameka yomeemwedi Kotoba naNoveba neudo. Evalulo lomwaalu wovanhu va fila moiponga yomatuwa moNamibia kudja Januali fiyo efiku eti 5 laNoveba ,neudo ovanhu 641 ova fila moiponga yomatuwa omanga momumdo 2016 ovafi ove li 721, nande omwaalu woudwaali ou li pombada oiponga neudo otai endelele unene.

Etokolo lokukunghilila ovashingi vomatuwa Amutenya okwe li yandja eshi twa finda poivilo yomatango manene, naashi Noveba omwedi haku ningwa alushe omailikano opo oiponga yomeendjila moNamibia I lotele. Ta weda po kutya, Namibia oye oshilongo shi li ponomola yotete moiponga yomatuwa mounyuni, yee oye ngoo natango oshilongo shi li ponomola yotete mokunwa omalodu moilongo yomuAfrica.
Oiponga ihapu meendjila domoNamibia oya etifwa komatuwa haa alangata, omalidengo mumwe novaendi kolupadi, novanhu vahapu ova fila moiponga yomaalangato nomalingwadjulomumwe omatuwa. Amutenya ta yandje oihopaenenwa yoiponga italala yomalidengo mumwe omatuwa moitukulwa ya yooloka, kwa didilikwa kutya oiponga ihapu oya etifwa kovashingi va kolwa.

Amutenya okwa ti, moivike itatu ya dja ko keshe oshivike ovanhu ve dule po-10 ova fila moiponga ya ningwa moitukulwa ya yooloka. Oiponga oya etifwa kovashingi tava shingilile shidjuu kupangela etuwa ngee etaiyela ola topa ilo ngee olai mondalaye oto nyengwa okulipangela. Oiponga ikenyeneka oya ningwa meendjila ; Okahandja -Windhoek,Kalkveld – Otjiwarongo mwa fila vavali mosheendifo mwa li vaheyali, Tsumeb –Grootfontein, Omungwelume- Oshakati. Oshiponga shopokati koKalkveld – Omaruru omwa fila vatatu vomuvatano, sha etifwa komushingi a li ta shingi yee ota tumu etumwalaka mongodi.

Omunambelewa woMVA Fund okwa kumaida ovashingi va fimanekafane moitauwa aishe te va dimbulukifa eshingo lidjuu pefimbo lodula .Okwa kunghilile ovashingi va diinine okutema eelamba efimbo keshe, va diinine oinano pokati komatuwa , vaha pitilile omatuwa meendalae ilo uhe wete komesho, omusholondodo womatuwa ilo okupitilila etuwa ponhele inai pitikwa. Okwa dimbulikifa ovashingi va fimaneke omalweendo oinano ile va shinge omutenya opo kuyepwe oiponga, voo va lundulule eshingililo tu yepe oiponga moNamibia opo epangelo liha file oshisho vahapu va lemanekwa koiponga, opo Namibia neudo a xulile pomwaalu woonakufila moiponga ovo 641.

LEAVE A REPLY

Please enter your comment!
Please enter your name here