Tava longo oipundi noitaafula okudja moyeekelwashi

0
84

Tuulikki Abraham

Oranjemund-Ovakainhu veli manga kumwe mOranjemund, moshitopolwa sha //Karas otava kendabala oku eta po eemhito doilonga unene tuu kovanyasha, eshi va dika po oprojeka ye dina Decoran Recycling, yokulonga oipundi, oitaafula, eenghaku ,eendjato, nounima vopoitaafula, tave va longo, moinima oyo yali ya ekelwashi.

Omupresidente wo Southern Women in Business Linda Amutenya, okwa lombwela Kundana kutya oprojeka Decoran Recycling oya totwapo koshi yo Southern Women in Business, omo ovakainhu 21 ve limanga kumwe, tava ongele oshimaliwa, okudja meendjato davo vene va dule oku shakeneka epangelo ondjilakati, nokuyandja oilonga, kovakainhu vakwao na unene tuu kovanyasha.

Amutyenya okwa tumbula kutya, oimaliwa oyo ya ongelwa po kovakainhu, oya longifwa mokufutila omadeulo ovanyasha veli 15. Ovanyasha ovadeulwa kovanawino vadja poshishiinda longo South Africa, nghene tava dulu okundulukapo oinima yayooloka, tave ilongo moi ekelwashi, ngaashi omatayela,eetyupa, eembapila, eeplastika nosho tuu. Okwa tumbula kutya ovanyasha va 5 paife otava longo moprojeka Decoran Recycling mOranjemund, tava nduluka po oipundi noitaafula, ya longwa nomatayela eehauto, neenghaku, oundjato vopeke, oipeko yomambo nounima vopoitaafula. Oprojeka oya totwa muJuni neudo.

Amutenya okuna etumwalaka eli yukifa kovakainhu moshilongo ashishe kutya, na va kale vena ohole noshiwana, nava kwatafane, nokulongela kumwe noudiinini opo ashike tava dulu okutunga oshilongo shi yambukepo. Lavinia Shinedima naye okuli oshilyo sho projeka yo Decoran Recycling mOranjemund, oo ta tumbula kutya ovena omhumbwe yoshimaliwa, opo vadule okuyambula po opojoyeka ei. Shinedima ota ti ovena omhumbwe yeshina lokuhondja oilongomwa oyo tava nduluka, opo ikale ya wapala nawa yoo ihokiwe yoo kovalandi, meni lodoolopa ya Oranjemund, oshoyo moshilongo ashishe.

“Eshina lokuhondja olo twa pumbwa otali pula konyala N$100 000, onghene ngee otwa mono eyambidido, lopashimaliwa ndele hatu lande eshina olo, noku landa yoo oilongifo aishe tai pumbiwa, nena ohatu dulu okunduluka oilongomwa ina ongushu, osho tashi ka hapupaleka yoo neemhito doilonga, osho tashi ka vatela ovanyasha vahapu ovo vehena oilonga modoolopa ya Oranjemund,” Shinedima osho a popya.

LEAVE A REPLY

Please enter your comment!
Please enter your name here