Taya kondjitha omukundu gokwaahena omagumbo

0
74

Maria Namupala

ONDANGWA-Omukwatakanithi gwehangano lyoShack Dwellers mOndangwa Penny Shikongo pamwe niilyo, oyu uvaneke taya tsikile moonkambadhala dhawo dhokukandula po onkalo yokwaahena omagumbo.

Onkalo ndjika oya guma noonkondo aaniiyemo iishona osho wo mboka haya mono iiyemo yopokati, koombinga adhihe dhoshilongo.
Iilyo yehangano ndika oya ningi euvaneko ndika pethimbo ya taamba ooshako dhosamende 40 okuza kehangano lyOhorongo, dha gandjwa, mekwatelo komeho lyombelewa ya Ngoloneya gwOshana Clemens Kashuupulwa. Shikongo okwa ti mOndangwa omuna oongundu dhoShack Dwellers 56, dhi na iilyo tayi tengenekwa ya konda pe 1 820. Iilyo mbika ohayi pungula oshimaliwa shawo mombaanga yoStandard. Pethimbo ndika oya tunga omagumbo 102 ga pwa nale ,na oyi ipyakidhila okumanitha 28 ngoka taga adhika kolukanda lwOndiiyala.

“Tse yene otatu lalakanene okukandulapo omukundu gokwaahena omagumbo nomalukalwa, naashika otatu shi pondola uuna pu na elongelokumwe mokati kiilyo yetu, osho wo uuna tatu longele kumwe nomalelo gondoolopa dhetu, eshongo ndika olili oshilongo ashike, kakele otali kala lya kandulwapo okupitila mehangano ndyoka tali tu yambidhidha,” Shikongo ta ti ngaaka.

Okwa ti ehangano ndyoka ohali gandja ompito opo mboka yaana omagumbo ya vule ya tunge omagumbo gawo gopashinanena. Oyendji yomwaamboka taya ka tunga omagumbo gawo oye na iiyemo iishona, yo ohaya zi owala miipeleki. Okwa ti otaya lalakanene opo aantu ayehe mbaka ya ze miipeleki yaye momagumbo gomakuma, yo ya kale ya gamenwa ethimbo alihe.

“Shack Dweller ote tu kwathele opo oondjodhi dhetu dhi ninge dhoshili, ohatu tholoma oondhopi tse yene tse tatu kongo mboka taya tungu tatu ya futu niimaliwa mbyoka hatu pungula kombaanga, shika osha hala kutya iilonga otse yene hatu yi longo po” Shikongo ta ti.

Ehangano ohali shi ningi oshipu opo aaniiyemo mbaka ya vule okumona omahala mpoka taya tungu omagumbo gawo pa pitikilo lyomalelo goondoolopa. Iilyo yehangano otayi ende tayi indjipala esiku kehe.

Shikongo ta ti ohaya gongala pomahala nomahala yo taya, tala nkene taya humitha komeho ehangano. “Otwa kondja ngaashi tatu vulu opo tu tule ayihe melandulathano mokuyambula po ehangano lyetu, otwa pandula omolwuuwanawa mboka ehangano lye tu ningila sho lye tu pa ompito opo tu imonene omalukalwa,” Shikongo ta gwedhapo.

Iilyo yehangano ndika oya ti oosamende ndhoka otaye kedhi longitha muuwanawa waayehe. Oya longitha wo ompito ndjoka okutseyitha kutya oya taalelwa keshongo lyokwaahena omahala mpoka taya tungu omagumbo gawo moshiluku sha landulako.

Mayola gondoolopa yOndangwa Paavo Amwele ngoka naye a li poshiindingili, okwa pandula aaniiyemo iishona, molwoonkambadhala dhawo. Okwa uvaneke taya ka gandja oshipambu shevi, mpoka aantu mbaka taya ka tsikila nokutunga omagumbo gawo.

LEAVE A REPLY

Please enter your comment!
Please enter your name here