Edimbuluko lefiku loupononwa

0
47

Komutoolinghundana

OSHAKATI-Ehangano loundjolowele mounyuni ola tula po Noveba 17, odula keshe kudimbulukiwe edalo loupononwa mounyuni. Ouyelele owa yandjwa kondokotola koshitukulwqa shounona moshipangelo shaShakati, moshitukulwa shaShana Alfeus Ipinge
Ndokotola Ipinge ta endulula ouyelele wehangano loundjolowele mounyuni eli la tonga kutya, keshe odula ohaku dalwa oupononwa ve fike peemiliyuna 15, mokati keehanana doupononwa ve dule omiliyuna ohava pitilile po keshe odula. Omo 60% domafyo eehanana doupononwa oda dalwa moshitukulwa shokoshi yOmbuwa ya-Sahara.

Omolwonghalo ei ya pumbwa ekwafo lomeendelelo ku xupifwe oupononwa, Ipinge okwa ti 2008 ehangano loundjolowele, ola tokola opo efiku Noveba 17, li kale hali dimbulukiwa komapangelo oilongo mounyuni kupukululwe oshiwana koyeetifi yedalo louhanana inava kola.
Ta fatulula oyeetifi yokudala eteelelo inali wanifa eemwedi omuwoi ngaashi ; omuteeleli ha nu omakaya ilo omalodu, okuninga eteelelo e na omido dishona koshi yeedula 18, a vela omikifi dohoni, omateelelo ihaa fuda po ilo okuumbata ounona ve dule kamwe oshita oimwe po ya didilikwa.

Omunambelewa woundjolowele ta yelifa kutya, nande efiku la tamekwa ku dimbulukiwa mounyuni 2011 moilongo imwe po, oshikando shotete Namibia ta dimbuluka efiku loupononwa koshi yoshipalanyole “Xupifa oupononwa nomikalo tadi dulika”.
Ondokotola moshipangelo shaShakati tai yelifa kutya, ehangano loundjolowele mounyuni ola twa omufindo kukumaidwe aveshe ve lilongekida kuya momateelelo va kale va pewa ouyelele koyeetifi yokudala ounona omanga omateelelo inaa wanifa oivike 37 ongongaba yokweeta okaana ka kola.

Namibia okwa kumwa koudjuu wedalo leehanana inadi kola noshipangelo shaShakati oko haku yukifwa omikundu da nyengana okudilila koipangelo 10 moshitukulwa. Ndokotola Ipinge ta ti, omivalu doupononwa omukundu wa shiivika moipangelo moNamibia.
Ta ti, ongongahangano youndjolowele oya popila omukalo woKangaroo Mother Care. Kangaroo otau longo moipangelo okumangela ohanana inai kola ponhulo ya ina a nangala ongali.

Omukalo ou na ombilixa notau kwafa eshi omudali ta ulike ohole kohanana, tei udifa ohole noupyu, te i amene koilanduli ihapu shi dulife okukala mokakefa koupyu (incubator).

Kangaroo Mother Care omukalo wombilixa, notau dulu nokulongifwa kounona veheshi oupononwa.
Nande omivalu yomafyo oupononwa otai ka tongwa pefimbo lomapukululo moshipangelo shaShakati Noveba, 17, 2017, Ipinge okwa kumaida keshe omudali manga ina ya meteelelo a kale nouyelele osheshi okwa didilikwa omwaalu woupononwa wa tana okutameka peegrama 750 nokaana ke na eefunda da wana ongeenge ka dalwa neekilohalama 2,5.

Okwa shiva ovo va dalelwe oupononwa ve uye va yandje ouyelele oshoyo ovo va tekula oupononwa va ulike oihopaenenwa.

LEAVE A REPLY

Please enter your comment!
Please enter your name here