Ekonaakono loCancer yovalumenhu la nana vahapu

0
37

Komutoolinghundana

ONGWEDIVA-Oikonga yomaudifeko kombinga yoshiponga shomukifi wokankela moshiwana neudo (2017) oya nanena ovalumenhu vahapu moshipangelo shaMedipark mOngwediva.

Ouyelele owa yandjwa komupopili ko woshipangelo shaMedipark Otto Amputu.
Amputu ta yelifa kutya nande oshikonga sheudife ko nekonaakono lovalumenhu oshikando oshititatu tashi ningwa neudo, ovalumenhu vahapu ova nyamukula keshivo lefiku lavo la li ko pehovelo lohani ei.

Ovalumenhu vahapu ova li pekonaakono ve dulife oikando ikwao yotete ivali, oshikando shotete omoMedipark, sha landula ko okOmuthiya moshitukulwa shaShikoto.

Amputu ta weda po kutya ovalumenhu 800 lwaapo ova ile keyandjo louyelele ou, 300 mokati kavo, ova konaakonwa noshidjemo shekonaakono otashi ka shiivifwa diva. Ava va monika omadidiliko omukifi wokankela oshipangelo otashi ningi omalongekido nghee tava hakulwa, Amputu ta ti.

Omunambelewa omupopiliko woshipangelo ta yelifa kutya, ekonaakono lokankela koilyo yoidalifi yovalumenhu ve li po aveke ola tamekwa 2015 eshi kwa didilikwa kutya, ovalumenhu ove na ounghundi wokuholoka komakonaakono oludi eli no itava dulu kukonaakonwa oshita mefikulimwe novakainhu.

Onghee oshipangelo osha katuka onghatu ei, eshi kwa monika kutya omukifi owa tandavela.
Okwa ti, ovalumenhu inava manguluka okupopya omaunghundi avo moipafi yovakainhu, navali ihava fiki diva koipangelo nande ova kale tava vele ova didilikwa ha ve ya va olwa.

Amputu okwa ti, neudo 2017 oshikando oshitihamano okudja ekonaakono lotete loludi eli la ningwa 2012 moMedipark la li la kwatela mo aveshe, tali twalwa koshipangelo shaIndira Gandhi koshitukulwa shaMusati 2013, opo nee 2014 tali ningilwa moMedipark, 2015 okEenhana, 2016 ola ningwa kOmuthiya oko kwa konaakonwa ovalumenhu ve fike po-50.

Omunambelewa omupopiliko woshipangelo shaMedipark ta fatulula kutya, ekonaakono etitatu lovalumenhu neudo olishambula eshi la etelela ongudu yovalumenhu va uka 800, va li poxungi omanga 300 va konaakonwa. Oshipangelo osha mona kutya, omukalo ou otau va eta popepi nouhaku.

Kakele kekonaakono lovalumenhu, ovakainhu ve dule po-2000 ova li pefiku lavo lekonaakono lokankela yokevele, koshivelo shoshidalelo, da shiivika da kwata ovakainu vahapu moshilongo.

Okankela oimwe yomikifi di li komesho nhano mounyuni tadi li ovanhu noshipangelo shaMedipak otashi longekida okweeta po eenghendabala tadi kwafele oshiwana.

LEAVE A REPLY

Please enter your comment!
Please enter your name here