GIZ Basketball Artists School tayi humu komeho moKatutura

0
17

Shipi Elago

Oshakati-Omutoolinkundana gwomaudhano Shipi Elago okwali a talele po oshiputudhilo shotango moNamibia shoBasketball shoka shi li mendiki lyaagundjuka moKatutura opo iimoneneko ye mwene nkene shika ta shi longo.
Moonkundathana na Malakia Matias omudheuli omukuluntu pendiki ndika na oye gwumwe ha sile oshimpwiyu iikwamaudhano posikola ndjika yoBasketball.

“Oshiputudhilo shika osha li sha totwa po mo 2010 nomagano ga za kehangano lya GIZ nelalakano okukwathela mependule po lyomaudhano moshilongo,” Malakia a ti.

Okwa ti oya li ya mono eha meni lyendiki lyoKatutura Youth Center moka ya li ya tungulula uupale woBasketball noku eta omatungo pomuthika omwaanawa moka haya gandjele ootundi kaanasikola mboka haya kuthombinga mopolohalama ndjika ya tseyika nawa Basketball Artist School.

Konyala uunona wa konda pomilongo ndatu wa za koosikola ngaashi, People`s Primary School, Mandume Primary School, AI Steenkamp, St Barnabas, ohawu kuthombinga mosikola ndjika hayi tameke pombali konima sho oosikola dhawo dha zimbuka.
Uunona mbuka oha wu pewa omwiha pendiki mpoka kehe esiku omanga ina ya ya mo madhewo goBasketball ngoka ga kwatakanithwa nelongo lyopankalathano (life Skills).

Uunona mbuka ohawu nongekwa wo nkene wu na okuyanda omashongo agehe gomonkalamwenyo okupitila momaudhano.
Malakia okwa ti endiki ndika otali kwathele okukutha uunona momapandaanda noku wu kaleka wi ipyakidhila niinima tayi tungu.
GIZ ehangano lyaNdowishi ndyoka ta li kwathele miilongo ya Africa okuyambulapo iikondo ya yooloka nokweeta eputuko momidhingoloko dhayooloka menenevi ndika.

Oli li wo ha li tumu aaNamibia koNdowishi opo ya ka mone omadhewo miipambele yomaudhano ga yooloka, mboka ye li ngashiingeyi ta ya longo noku eta omalunduluko momidhingoloko dhawo sho taya kwatele komeho oopolohalama dhomaudhano miitopolwa ya yooloka yoshilongo. Pendiki mpaka ohapu kala aadheuli naadheulwa yi ipyakidhila niinakugwanithwa yawo yesiku.

LEAVE A REPLY

Please enter your comment!
Please enter your name here