Kotokeleni ethimbo lyomatyapulo

0
41

KuLogan Fransman

Omumvo kehe ndika ohali tu adha omanga inaa tu shi koneka. Ethimbo lyomatyapulo , lyoku paathana nokudhenga uuhalasa kumwe osho wo oku wu yelutha pombanda, lyokudhiladhila kombinga yefudho, okukatalela po ofamili nosho wo okuthiga po onkalo ya pupyala. Ihe shika ohashi ya ashike konima yoopaati dhokiilonga noombelewa dha ningwa, omatyapulo gopehulilo lyomumvo gwiilonga noshowo okuya pamwe pankalathano. Twi izaleka nawa, tse tatu iyopaleke nawa miipala, tashi vulika wo tatu danisa na otuli pombaa ye eguluka. Eeno oshi li mondjila ombaa oye eguluka. Otashi uvika sha fa edhiladhilo ewanawa ndele ndika olili pamwe nuupyakadhi.

Omumvo ogwa li omule onkene opaati yokiilonga oya fa oyo ehala lyo opala oku manguluka nokutyapula naantu mboka hoka kala nayo esiku kehe. Eshongo lyotango olya holoka manga ashike nokuli inoo za nomegumbo nenge mombelewa.

Okutya oto thiki ngiini kopaati hoka nenge kuulalelo mboka. Omatyapulo ngaka olundji ohaga ningilwa moohotela dhopombanda , pomahala gokulila nenge ngoka wo ge shiwike nawa miinima yomainyanyudho. Shika otashi ti omuyenda gwokopaati ndjoka okwa pumbwa osheenditho shoka tashi mu thikitha hoka. Mpaka opo ishewe ta pa holoka iidhiladhilwa yilwe. Atuhe otwa hala okumanguluka noku fudha po.
Okambiila katalala nenge okawina utye omikisa yiikunwa ya yooloka mokahalasa kamwe noku uva uugumbo sho ayihe tayi ende nawa. Epulo olyo nee ndika otatu shuna ngiini kegumbo sho tu shi shi kutya otwa li tatu nu?

Ngele omuntu okwa nwamo uuhalasa wu vule kamwe nena mpoka opu na nale uupyakadhi, shimwe okupopya omuntu itoo ningile mo , okudanisa inaaku opala nenge okudhiladhila kutya omuntu oto vulu natango okuhinga sho to shuna kegumbo to thiki nombili nomegameno.
Oalkoholi oyo olundji hayi pelwa ombedhi molwashoka ohayi gandja eiyuvo lyokukala omuntu waa na uutile nuumbanda washa. Atuhe otu shi omaso omawinayi nogendji haga holoka moondjila dhaNamibia.

Omiyalu dhomaso ngaka niiponga mbika ohadhi londo pombanda pethimbo lyomatyapulo unene tuu popepi noKrismesa na unene ethimbo lyuusiku konima yopaati yokiilonga nenge ndjoka yopehulilo lyomumvo.

Okweenditha oshinima sha nkene omuntu to inyenge okuza kehala limwe okuya kekwawo. Onkene ngoye naafaalelwa yoye nane omuli ashike iinima mbyoka yi na okuthikithwa hoka taya falwa inaa yi yonuka nenge inaayi tatuka. Nane wo omwa pumbwa okuthika komagumbo geni mu li nawa nomwa gamenwa. Omolwashika okuenditha nokufala okwa simaneka eenditho lyiinima nolyaantu nawa taya thiki nombili nomegameno. Onkene oku enditha aantu niinima itaku yi komeho nenge kuye komitse ngele huka ita ku longwa nuukeka noku na egameno. Shika ina shi kwata ashike ehalo lyomuntu gumwe okumona oondjila dhina egameno ndele osho ehalelo lyomuNamibia kehe okumona kutya iiponga yomoondjila oya shunithwa pevi.

Otashi ehameke nokunikitha oluhodhi sho Namibia oye omukomeho miiponga yomoondjila muuyuni.
Eeno shika onkalo ombwiinayi ihe nando ongaaka aantu oyendji oyi itaala kutya otaya vulu okunwa ndele nokuhinga otaye ku vulu wo. Yamwe oya itaala kutya aantu yalwe oyo ashike haya eta iiponga nenge oyo ye na uudhigu wokunwa nokuhinga iihauto yawo. Omalupita omuntu oho nu ngoye to hingi ndele oto thiki kegumbo nombili nopwaana shoka sha ningwapo, oto thiki wa kolwa na owi ilongekidha okuya mombete yoye.

Oho kala wa nyanyukwa wo okumona kutya oshihauto shoye oshi li megameno mpoka ho shi thikameke konima yokushihinga wa kolwa. Ihe owa pumbwa wo okudhiladhila okathimbo kombinga yaamboka ihaaya thiki komagumbo gawo ngaashi ngoye we shi ningi nenge ihaa ya thiki megameno nenge ihaa thikilile ko tuu nande.

Efamili lyoye, omusamane /omukulkadhi gwoye, ookuume naaniilonga ooyakweni mombelewa otaya ka kala nuudhigu no noluhodhi okutseya nenge okukundana kutya itaye ku mono we nenge ito galukile ko we kiilonga no ito kala po we poshipundi shoye, shika sha etwa koshiponga moluukolwe. Oshikwawo oshiwinayi ooshika kutya otashi vulika ongoye we etitha oshiponga shoka sha hulitha po omwenyo gwomuntu nenge gwaantu mboka inaa ya vula we okuthika komagumbo goyaandjawo. Shika otashi ku thigile uupyakadhi wu vule mboka wa etelwa kopapalase konima yopaati.

Okulongitha kashona otashi vulika tashi kwelengendja shafa inaashi opala ndele omwiityo gwasho otagu ti sha. Oshoka kehe shimwe momwaalu omushona otashi popi mondjila. Onkene uuna to yi ishewe kopaati yombelewa tayi landula soshimpwiyu kutya owuna ngoka te ku fala hoka ye te ku galula , nenge ngele itashi vulika futa ondunda yokulala mohotela moka mwa ningilwa opaati ngoye to tsikile olweendo lwoye ongula yesiku lya landula konima yopaati.

Opena oompito odhindji ndhoka to vulu okulongitha okuyeleka nokunwa ngoye oto ka hinga. Tyapula opaati yoye ngoye to gandja iilonga yoku hinga kugulwe.

● Logan Fransman Omuwiliki gwendiki lyoNamibian-German Centre for Logistics (NGCL) ndyoka hali longo nokupekaapeka kombinga yomaenditho, ohali gandja wo omayele kombinga yoku inyengitha iinima momikalo adhihe dhiiyenditho. Endiki ndika ohali adhika poNamibia Yuniversiti yUudhindoli nuUteknologi.(NUST).

LEAVE A REPLY

Please enter your comment!
Please enter your name here