Oalbuma yaJomolizo “Epata Lange” osho ya thikana

0
71

Ku Pinehas Nakaziko

Windhoek-Jomolizo ngoka ha imbi oongalo dholudhi lwo Afro-Pop, osho a pititha oshipandi shoongalo dhe 14, kohi yedhina Epata Lange.
Nedhina lye pakuudha Halweendo Moses, Jomolizo okwa ti oalbuma ndjika itayi ka thiga omuntu a kuutumba, no kapena ngoka ta ka kala inaa hala oku yi pulakena, oshoka okwa etelela oongalo ndhoka oombwanawa.

Shika otashi imonikila mongalo ndjoka a li a pititha tango yedhina Kumininenge ta kwathelwa kuShitana iiwike ya piti, ongehwahwameko, noku gandja omulyo gwoongalo ndhoka dhili moalbuma muka. Kumininenge ongalo ndjoka ya kala noku dhanwa olundji, unene kooradio adhihe dhOshiwambo. Oya kala ishewe oyo yimwe dhingi methigathano lyoongalo moshilongo, ndyoka hali ningwa koradio yoEnergy 100 FM, osho wo Shipi FM, hayi uvika okuza moombelewa dhayo mOndangwa mOshana..

Oalbuma ndjika ompe oya li ya piti petameko lyomwedhi nguka. Okwi imba oongalo dho muyo Jomolizo okwa kwathelwa kuTequila, Shitana, Bantu na Mr Glo.

Moalbuma otamu adhika ishewe oongalo mbali Mkwaluvala na Kaandjetu, ndhoka dhali dha holoka moalbuma ye yotango yedhina Kaandjetu.
Jomolizo okwa lombwele Kundana ta ti aaholi yoongalo dhe okwe ya longekidhila oshindji, ngele tashiya moongalo. “Kakele kandje menduluko lyoalbuma ndjikaa onda kwathelwa kaaningi yiikwelengendjo ngaashi Glo naArafat. Onkene ndjika oyi li pomuthika gwopombanda yi vulithe oalbuma yotango, oshoka ka nda li ndina ekwatho lyagwana,” Jomolizo ta ti ngaaka.

Okangalo Epata lange otaka thaanekwa okavidio muDesemba moSouth Africa. Jomolizo okwa kala noku nyanyudha piituthi oyindji mOngwediva, mwakwatelwa omauliko giipindi gaNgwediva, moka ali a nyanyudha oyendji. Nuumvo okwali ishewe a uvathana na Ndjodic Dragan, sho ali a shaina nehangano lyoAntonio’s Arts, ndyoka hali humitha aahikingalo, unene mboka aashona komeho. Oalbuma ye ompe oyali ya piti kohi yehangano ndika.

Jomolizo omuhikingalo ngoka a tseyika noalubuma ye yotango muAguste nuumvo hayi ithanwa Kaandjetu. Okwa tamekele oongalo mo2009, moka ali ha ningi omikwelengendjo dhaahikingalo aashona. Mo 2010 okwa li a kambadhala opo a tameke oku imba, nokwali a imbi ongalo ye yotango yedhina Sisiwami, moka a ulike omakumagidho gamumwayina kadhona ngoka a li e mu kumike opo i itule mokuhika oongalo, oshoka oku na ewi ewanawa. Nokuza mpoka okwa kala noku ilongekidhila oalbuma ye, ndjoka a pititha mo2015.

LEAVE A REPLY

Please enter your comment!
Please enter your name here