Oshiindingili shongopolo nuumvo osheenda nawa

0
28

Maria Namupala

TSUMEB-Omunashipundi goshituthi shokomumvo shongopolo Julius Gaeseb okwa ti, oshituthi nuumvo osheenda nawa okuyelekanitha nomimvo dha ka dhilongela. Gaeseb okwa holola kutya oshituthi shika osha longekidhwa nokutyapula oomvula 15 dhuukalipo washo, nohashi dhanenwa mondoolopa ya Tsumeb moshitopolwa Oshikoto. Moonkundathana ndhoka twa ningi naye pethimbo lyoshituthi shoka , ongomunashipundi okwa ti shika osha tamekele pehulilo lyaKotoba nosha fumvike onkolo petameko lyomwedhi nguka.

“Oshituthi shongopolo shoka sha tseyika nawa Copper Festival oshali sha totwa po mekwatelokomeho lya muni gondoolopa yetu, pamwe nomahangano ngoka taga ngeshefa muka. Otashi lalakanene okuyambulapo nokuhumitha komeho oongeshefa osho wo okuyambulapo eliko lyoshitopolwa,” Gaeseb ta gwedha po.

Gaeseb ta ti nuumvo omwa li mu na aalandithi konyala taya ihilile po 200 lwaampoka, noyendji yomuyo aanangeshefa aashona. Gaeseb okwa ti oya teglela unene aanangeshefa aashona noyopokati oyo ngaa ando ya kale taya kuthombinga , yo ya yambule po oongeshefa dhawo, nokukutha iiholelwa kaanangeshefa aanene mboka ya kala mo nale mongeshefa.

“Onga shimwe shomiilalakanenwa yetu oshituthi shongopolo ohashi gandja ompito kaanangeshefa yomomudhingoloko , oshowo kehe ngoka ta vulu okuthika nokuna ompito a vule a kuthombinga ye a hangane naanangeshefa ooyakwawo, yo taya tseyathana ya topolelathane uunongo nontseyo yongeshefa ndjoka yena, yo ya kale yeshi kutya moongeshefa ohamu kalwa ngiini,” Gaeseb a ti.
Gaeseb okwa tsikile a ti oshituthi shoNgopolo oshi na uuwanawa owundji kaanangeshefa oshowo ku ayehe taya talelepo ondoolopa yaShomeya pethimbo lya sho. Nuumvo oshali sha dhanwa kohi yoshipalanyolo “ Ongolopo tayi lalakanene onakuyiwa yi li hwepo”.

Pethimbo a egulula pambelewa oshituthi shika Minista yOmayambule po gomoondoolopa nokomikunda Sophia Shaningwa okwa pandula elelo lyoTsumeb, sho tali kambadhala oku eta omayambulepo popepi noshigwana.

Shaningwa ta ti oku uvite etumba okukala pamwe naanangeshefa ya yoolokathana yo taya kundathana, noku ndukikathana nkene taya tungu oshigwana nokushi humitha komeho. Okwa pula aanangeshefa ayehe ya longele kumwe. Ta indile aagundjuka ya kale haya kuthombinga miinima ya pamba oongeshefa nokutota po oongeshefa yi imonene iilonga mbyoka tayi ya kwathele.Okwa uvaneke kutya epangelo otali kala noku kwatha unene ku ayihe ya pamba uunangeshefa, nokukwathela mokukondjitha oluhepo nondjala moshilongo.

Okangundu longekidhi oka pandula omahangano ngoka ge ya yambidhidha opo ya vule ya endithe nawa oshituthi shika. Gamwe gomomahangano ngono ga kwathela ongaashi Dundee Precious Metal ndyono lya kala olyo ekwashilipaleki enene muule woomvula heyali dha piti, Standard Bank, Cenored, MTC, naWeatherly Mining Namibia.

LEAVE A REPLY

Please enter your comment!
Please enter your name here