SADC ota landula onkalo moZimbabwe

0
167

Omutoolinkundana

Windhoek-Aawiliki yiilyongo yEhangano lyUukumwe wOmapendulo mUumbugantu wAfrika [Southern Africa Development Community (SADC)] onkene natango inaa ya tya sha kombinga yomalunduluko nenge yaashoka tashi inyenge moZimbabwe pethimbo ndika. Oshiwike shika Omupresidente gwa South Africa Jacob Zuma, moshinakugwanithwa she ongoOmunashipundi shoSADC okwa tumine osheendo koAngola shika kundathane nOmupresidente gwoshilongo shoka Joao Lourenco. Angola, mewiliko lya Lourenco, oye Omunashipundi sholutu lwo SADC lwOpolitika, Egameno nEpopilo, okumu kuthila ko kombinga yonkalo moshilongo shoka.

“SADC ota kala noku tala nawa noku landula nawa onkalo moshilongo shoka na okwi ilongekidha okuyambidhidha mpoka sha pumbiwa opo onkalo yopolitika yi vule okupotokononwa pamilandu dhoSADC nomautho golutu nduka,” Zuma a ti.

Aakwiita yaZimbabwe oya kutha ko ewiliko moZimbabwe ongula yEtitatu oshiwike shika, ya yi kosasiona yokutuma omawi mOmbepo ya Zimbabwe, ZBC noku lombwela aaniilonga ya ye komagumbo. Aakwiita oya lesha omushangwa gwa ti “Tse otwa odheka ashike aalongi yiikulumuna mboka ye mu kunduka yo mbaka oyo taya longo omuyonena notaya eta omahepeko gopankalathano nopamahupilo moshilongo. Shika otatu shi ningi okuya eta komeho gompangu. Nu una twa mana shika nenge twa adha elalakano lyetu , otwa tegelela onkalo yi shune kuuwanawa nenge yi galukile kethimbo lyayo lyoshito”.

Aakwiita oya gandja eshilipaleko kutya Omupresidente Robert Mugabe nefamili lye oye li megameno. “Otwa hala okukwashilipaleka oshigwana kutya Omusimanekwa, Omupresidente gwo Republika ya Zimbabwe, omutse gwoshilongo, nepangelo noku li wo Omugandjimalombwelo gwomatanga gaakwiita, Hailwa Robert Gabriel Mugabe negumbo lye oye li megameno nonkalo yawo ye popilo oya kwashilipalekwa.”

Aakwiita oya kutha ko ewiliko moshilongo moshilyolongo shoSADC shika konima yomahilathano pokati kawo nongundu yaMugabe yo ZanuPF guule womasiku gaali. Omaandaha oshiwike shika Omugandjimalombwelo gwomatanga gegameno gpashigwana gaZimbabwe, Ndjayi Constantine Chiwenga‚ okwi idhopele moshinima shokulandulwa mewiliko lyoZanu PF sha landula etidho lya Emmerson Mnangagwa osho wo ekuthwo mo lyiilyo iikuluntu mongundu ndjoka mbyoka hayi mu yambidhidha, naashika osha etele uutile kutya otashi vulika pu kale eumboko lyepangelo koshipundi. “Natu dhimbuluthe mboka yeli konima yomatidho ngaka niinima mbika inaa yi opala kutya uuna tashiya pokugamena ‘orevolusie yetu’, aakwiita itaya sohoni okukatuka onkatu ‚” osho a ti.

Metiyali oshiwike shika Zanu-PF okwa gandja etumwalaka okupitila momushangwa lya ti aakwiita inaya idhopa mo miinima yopolitika, noya luku oshinima shika ekengelelo lyopombanda. Komatango gEtiyali aakwiita oya inyengitha omakanona okuza moontanda dhawo nokuga kankameka momapandaanda mokati koshilando Harare. Ongula onene yEtitatu aakwiita oya kutha ko osasiona yoTV, noku yi pata, noku kala ashike tayi dhana omusiki yopakwiita. Oya tula ishewe omakanona momapaandanda, oshowo aakwiita moondjila okuwilika iiyenditho, oya edhile oosasiona adhihe dhopolisi ndhoka dhi na omangandjina goondjembo niikuti.

Zuma okwa ti okwa kundathana na Mugabe mongodhi, naMugabe okwa ulike kutya “okwa kondekelwa megumbo lye nokwa ti okuli nawa’. Okwa tumu wo ontumwa opo yi ka tsakaneke Mugabe osho wo Omatanga gaakwiita gaZimbabwe.

Zuma “okwa ti okwa tegamena kutya iiningwanima yomoZimbabwe itayi hulile mekutheko koshipundi lyepangelo ndyoka lya tulilwe ko paudemokoli, oshoka shika osha tsompinge nomautho goSADC osho wo ngoka goAU.”

LEAVE A REPLY

Please enter your comment!
Please enter your name here