Uudhano puShinime owali uuwanawa

0
56

Maria Namupala

ONDANGWA-Omuunganeki guudhano wokomumvo posikola yaanona yopevi ya Shinime mOndangwa Johannes Martin, okwa pandula oshoka mbuka owa li uuwanawa no wa nyanyudha ayehe.

Martin okwa ti shika oshikando oshitine taya longekidha uudhano mboka, hawu dhanwa kaanona yokohi yoomvula 15. Omuthindo guudhano mbuka oguli unene kwaamboka wetanga lyokoompadhi nolyomokambamba.

“Ongomuunganeki guudhano mbuka ondu uvite etumba okuyelitha mpaka kutya uudhano wetu otawu ende tawu humu komeho omumvo kehe. Ohatu longitha omaudhano ngoka omanene, okukwashilipaleka kutya aanona ohaya kutha ombinga mu go ongoshitopolwa shomainyanyudho,” Martin a ti.

Okwa yelitha kutya nuumvo oosikola 15 odha li dha kuthombinga metanga lyokoompadhi, omanga oosikola ntano dha kuthombinga metanga lyomokambamba. “Elalakano lyetu lyokuunganeka uudhano mbuka wokomumvo okulongekidhila aanona ekonakono lya hugunina, yo ya kale ye na uuluyi wa vululukwa, taya dhiladhila nawa.” Martin a ti.

Okwa ti osha pumbiwa uunona wu putudhilwe omaudhano manga wuli mepipi eshona opo wu ka kale aadhani haya kalelepo oshilongo monakuyiwa, nokukwathela wo okuyambulapo omuthika gwomaudhano.

Muudhano wetanga lyokoompadhi osipana yokoNehale oyo ya thigipo adhihe no ye ya ponkatu yotango sho ya dhenge mo adhihe noku sindana ekopi, oombandi dhoshingoli 18 oshimaliwa shooN$1000, Ompandakani oye ya puutiyali ya pewa oombandi dhoshisiliveli nooN$800, omanga Onamulunga ye ya ontitatu ya pewa N$600 noombandi dhoshikushu.

Metanga lyomokambamba Gabriel Taapopi okwe ya gwotango a sindana ekopi,oombandi noshimaliwa shooN$ 700, Nehale okwe ya puutiyali ta mono oombandi nooN$500, omanga Ompandakani ye etelele okano etayi mono oombandi nooN$400.
Martin okwa ti uudhano mbuka owa egulukila konyala oosikola adhihe dha hala okukutha ombinga monooli yoshilongo, noya hala aanona ya kale taya nyanyukilwa pamwe.

Okwi itaala kutya omaudhano ohaga kutha po ezaza, nokugandja ompito kaalongwa ya thuwe po nokuvululukitha omadhiladhilo.
Okwa kumike oosikola adhihe dhi putudhile aanona omaudhano, yo aalongi taya kala ha ye ga longekidha nelalakano lyoku ga yambula po.

LEAVE A REPLY

Please enter your comment!
Please enter your name here