“Ngame otandi yambidhidha Team Harambee” – Kankoshi

0
209

Maria Namupala

OMUTHIYA-Ngoloneya goshitopolwa shaShikoto Henock Kankoshi okwa ti ye ota yambidhidha oTeam Harambee methigathano lyipundi tali ka ningwa ehuliloshiwike ndika moVenduka.

Kankoshi okwa koleke kutya ye ota ka hogolola ombinga yi ni pethimbo lyokongressa ontihamano yongundu yoSWAPO ehuliloshiwike ndika. Okwa popi hoka a gama pethimbo lyoshigongi sha ningwa koTeam Harambee ehuliloshiwike lya piti mOmuthiya

Ongundu yaa yambidhidhi yOmundohotola Hage Geingob, pamwe naa ulikwa mboka ya tegelelwa yaka hogololwe kokongressa ndjoka ya tameke nena oya gongalele momwaalu omunenesg Osoondaha ya piti pOmuthiya moshitopolwa Oshikoto.

Ngoloneya Kankoshi okwa li a pewa ompito yowina mpoka a yelitha kutya nonande e li kuume komukwatakanithi gongundu yoSwapo moshitopolwa shoka, Armas Amukwiyu, ye okuli ompinge niilonga mbyoka ta longo.

“Onda hala okushi yeleka mpaka montaneho yaayehe ya gongala nena kutya, ngame Henock Kankoshi otandi yambidhidha Omundohotola Hage ngoka oye uulika ndje ndi kwatele oshitopolwa shika komeho” Kankoshi a ti ngaaka. Okwi ikaleke kokule nomapopyo kutya ye ota yambidhidha Team Swapo, a ti ita vulu a dhine omupelesidente gwe, naambono yeli moshigwana taya popi kutya Ngoloneya ota yambidhidha ongundu ndjoka na ye shi hulithe po. Ta gwedha po kutya ita vulu woo okuya pombambo iilonga mbyoka a pewa komupelesidente, nokwa pula ayehe mboka ta yayi komutumba omutihamano, yaka hogolole nawa nomondjila. Moonkundathana ndhoka twa ningi nomupopiliko go Team Harambee Martin Kaali Shipanga, oshiwike shika okwa ti omundohotola Hage Geingob oye omupelesidente gongundu yoSwapo ta kwathele pethimbo ndika, nomakunde otaga ka za mooshendje sho taku ka tothwamo ngoka ta kala pelesidente uule woomvula ntano.

Shipanga ta yelitha kutya omupelesidende gongundu oha hogololwa aluhe konima yoomvula ntano, uuna oshikako she shokulela sheya pehulilo, ta ti oye na omukumo kutya Geingob pamwe naa ulikwa ye otaya ka sindana, kutya otashi pula shike. Ta tsikileko ta ti omutumba sho gwa li popepi oya tamekele niikonga yawo niigongi kiitopolwa konyala ayihe moshilongo, nomangungo gaantu mboka ya holoka ogeya tsu omukumo.

“Tse otwi itaala momupelesidente gumwe; nomongundu tayi pangele yimwe, onkene tatu pula aakalelipo mboka taya ka kutha ombinga ya hogolole aaulikwa mboka yeli mondjila, yo ya kaleke po ombili nuukumwe moshilongo, otwa hala woo okuyambula po onkalo yopaliko osho wo onkalo yaantu yetu,” Shipanga ta gwedha po.

Aaulikwa yo Team Harambee oyo Omundohotola Hage Geingob ngoka ta thikama muupelesidente wongundu, Netumbo-Nandi Ndaitwa omupevi plesidente, Sofia Shaningwa Amushangandjayi gongundu na Marco Haufiku omupevi amushangandjayi.

Ngoka a inekelwa a kalelepo oshitopolwa shoka Penda Ya Ndakolo, okwa holola okuuva nayi kwe molwa onkalo yuutondwe no yo kwaa ha longela kumwe mOshikoto.

Ta ti ombili ohayi teywapo kwaamboka kaa ye yi hole, nokaaa ye hole iinima iiwanawa mbyoka tayi humitha komeho oshilongo. Ya Ndakolo ta ti oya kalamo nale moshitopolwa ashike inaya mona nale etopoko nga ndyoka tali inyenge mo ngaashingeyi.

Ta ti yo otaya yambidhidha oTeam Harambee pamwe naaulikwa yawo, noyi itaala mokusindana. Okwa tegelelwa omakunde ga kaze mooshendje pethimbo lyomutumba moka Team Harambee no Team Swapo tadhi ka thigathana po. Team Swapo oya thikama po muNahas Angula na Jerry Ekandjo taya thigathana po muupelesidente omanga Pendukeni Ivula- Ithana muupevi presidente, Armas Amukwiyu muuhamushanga na Martha Tilahun-Namundjembo muupevihamushanga wongundu yoSwapo. Team Swapo nayo oya kala tayi ningi iigongi kiitopolwa ayihe konyala moshilongo, nokuulika aayulikwa yawo.

LEAVE A REPLY

Please enter your comment!
Please enter your name here