Omahangano naga sile oshimpwiyu aaniilonga

0
94

Maria Namupala

TSUMEB-Omupevi president nomukuluntu wiliki gwehangano lyoDundee Precious Metals moTsumeb Zebra Kasete, okwa ti aagandji yiilonga naya sile nawa oshimpwiyu aaniilonga yawo. Kasete okwa ningi eindilo ndika omasiku ga zi ko mondoolopa ndjoka sho a popitha aakwashigwana pethimbo lyoshituthi shoNgopolo. Kasete okwa ti aaniilonga oyo ehukamugongo lyehangano kehe, onkene oya pumbwa okulongwa nayo nawa no nesimanekwa. Okwa ulike oku uva nayi kwe konkalo ya yamwe yaagandji yiilonga moondoolopa dha yooloka moshilongo, sho yaa na esimaneko lyaaniilonga yawo nolundji ohaye ya longitha iilonga ya puka molwaashoka ka ye shi ekotampango nuuthemba wawo onga aaniilonga. Okwa gwedha po kutya aaniilonga oya pumbwa okutonatelwa nokusilwa oshimpwiyu nomukalo omwaanawa, yo taya kala ya shangithwa omauwanawa agehe ngoka ga pumbwa okushangithwa omuniilonga kehe.

“Okutala onkalo pethimbo ndika otayi yemateke, molwaashoka aagandji yiilonga ka ye na ko nasha naaniilonga yawo, no yi ininga aahona ookayamukulwa, nokuya ompango nooveta dhaaniilonga pombambo, nonande shoka hasho shina okukala. Otwa pumbwa okutseya kutya aaniilonga oya simana momahangano getu molwaashoka twaa ya na itatu vulu okuya komeho niilonga, nohashi vulika, omahangano getu ga pate molwompumbwe yaaniilonga,” a ti.

Okwa ti gamwe gomomauwanawa ngoka aaniilonga ya pumbwa ongaashi okutungilwa omagumbo opo ya kale yena omalukalwa, gawo nomazimo gawo.

Kasete okwa gandja oshiholelwa kutya ehangano lyawo oli na aaniilonga oyendji no tali kambadhala okupungula muyo, ta ti oya tamekele noshiluku shawo shotango okutungila aaniilonga yehangano omagumbo geli 65, ngoka a yelitha nenyanyu kutya pethimbo ndika oga pwa okutungwa, nokwi ipyakidhilwa okutungwa omagumbo 115 moshiluku oshitiyali, ngoka taga kala ga pwa mbala. Iilonga mbika oya tengenekelwa ooN$ 20 oomilliona.

Kasete okwa ti ehangano kehe ohali mono iiyemo molwaashoka oli na aaniilonga taya longo nawa, nokapena ehangano tali humu nawa komeho ngele itali tonatele nokusila oshimpwiyu aaniilonga yalyo, nongele ohali ya tonatele nawa ohali sindana miikumungu ayihe nomwaashihe tali lalakanene.

Ongondjodhi yawo okwa ti otaya lalakanene woo okugandja sha moshigwana nopendji ohaya gandja omakwatho koosikola oshowo koshikondo shuuhaku. Ta ti oya hala wo aanasikola ya kwashilipaleke kutya Dundee okwi ilongekidha okutalela po oosikola nokugandja omayambidhidho mpoka tashi vulika, yo aalongwa ya tsikile nelongo lyawo molwaashoka oyo aaleli yokomongula.

Caption (Pic: EMPLOYEE.jpg): Omupevipelesidente nomukuluntu wiliki gwoDundee Zebra Kasete.

LEAVE A REPLY

Please enter your comment!
Please enter your name here