Ombepo yaFidel Castro ita yi si we, omwolwa ondjokonona ye

0
58

Sebastian Ndeitunga

Kutse Fidel Castro Alejandro Ruz okwali tate noshowo omupukululi gwetu, ngoka a kala natse nota tsikile okukala mutse. Konima yemanguluko mesiku 1 Januali 1959, Cuba mewiliko lyaFidel Castro Ruz okwa kutha omakankameno gatatu gasimana ngoka taga adhika moshilimbo shopashigwana she: okwiilonga, iilonga nondjembo, ngaka otaga yambidhidhwa nenge otaga kwathelwa keiyuvo lyokukala, lyuukwawo wanankali nolyuukwashigwana wuuyuni.

Cuba okwa kutha onkatu yoku vudha mo okwaa tseya okulesha okupitila miikonga yelongo mbyoka ya li ya kwatelwa komeho kaagundjuka aanandjungu melunduluko. Mewiliko lye lyeigandjo, Fidel Castro kali ashike a tala aantu yaCuba oyo ayeke ihe okwa kwatha wo aantu yalwe muuyuni mokulongitha ondungethaneko ndjika. Mwaamboka a kwathela omwa kwatelwa omahangano omakondjelimanguluko ngaashi SWAPO ya Namibia.

Omumvo 1978 omatanga gaakwiita yomukolonyeki South Africa oga li ga dhipaga aaNamibia oyendji mboka ya li mokamba yuupitilo yaCassinga moshitopolwa shaHuila moAngola.

Konima yedhipago lyuubalabali ndika lyaakwashigwana mboka ya li inaa ya homata, SWAPO yaNamibia kohi yewiliko lya Hailwa Sam Nujoma, Kommanda Omukuluntu gwomatanga go People’s Liberation Army of Namibia (PLAN) okwa kugile iigwana yUuyuni onkugo opo yi kwathele SWAPO yaNamibia. Konima ye eindilo ndika aanona ye vule omayovi gatatu aaNamibia ya li mookamba dhoontauki moAngola na Zambia , ngaashi okuza moChibia, Chivemba, Nyango, Vietnam na N’Dalatando , oya pelwe ompito okukiilonga komanongelo ga yooloka noshowo piiputudhilo yopombanda ya yooloka miitopolwa ya yooloka moCuba.

Aalongwa yotango 601 mboka ya thikile tango moshilongo shoka omumvo 1978 oya li ya taambwa menongelo lyedhina La Esuela Secundária Básica en el Campo Nº 15 -Hendrik Witbooi omanga momumvo 1982 aalongwa konyala yeli 500 oya taambelwa moLa Esuela Secundária Básica en el Campo Nº 51 – Hosea Kutako. Omanongelo ngaka gaali ogali kokantuntu kedhina Island of Youth na oga longo aalongwa aaNamibia okuza pondondo ontintano sigo opondondo 12. Konima shampa aalongwa ya mana oongundu dhopevi ohaya taambelwa miiputudhilo yopombanda moshilongo shoka noshowo kiilongo yilwe mbyoka ya li yu uvite ukwawo wa nankali naantu yaNamibia. Kiilongo hoka kwa tumininwe aaNamibia ye ki ilonge ongaashi Soviet Union (USSR), Czechoslovakia noRepublika yUudemokoli yaNdowishi, neyambidhidho ndika ku Cuba ina li hula po natango.

Pomanongelo ngaka otwi ilongo iilongwa ye, endele pamwe nomakankameno ngoka taga monika muukwatya wetu sigo onena.Omakankameno ngaka gamwe oga kwatelamo uukwatya wokukala omuntu wu uvite uuntsa molwoshilongo shoye, wu na uukwawo wanankali wopaigwana, okulonga nuudhiginini, okukala wa tonata nokukala neinekelo mwene. Fidel naantu ye oye tu longo evuliko kutse yene, okuinekelwa noku ukilila hoka ku na iinakugwanithwa ndele haku tala kutya iihohela otayi zi peni. Ongomuvali nomuwiliki, Fidel okwa li aluhe ha monon ethimbo okuya etu talelepo ko Hendrik Witbooi School kontuntu ya Island of Youth nokutala kutya otatu yi ngiini komeho niilongwa yetu. Ekumiko kombinga yekondjelomanguluko lya Namibia olye tu pe etegameno nomukumo okwi ilonga twi itulamo, opo esiku limwe tu ka ninge aanamaithano naawiliki moNamibia ya manguluka,.

Castro okwa meneke mu tse ohole yehangano lyetu, kutya nee otuna omaudhigu nomashongo ge thike peni.Okwa li he shi popi niitya ye mwene ta ti (those who have no problems, don not need help), mboka yaa na omaupyakadhi ina ya pumbwa ekwatho. Momatalelo po ge kokantuntu ka Island of Youth, hoka oyendji yomutse twa kala ethimbo lyuugundjuka wetu , Fidel okwa li e na ethimbo na kehe gumwe na okwa li a tseya omadhina ga yamwe yomu tse. Okwe tu dheula opo tu mangele kumwe iilonga neilongo.Oshinima shika osha pumba miilongo oyindji na oshali sha ningwa opo tse tu vule okulonga iikulya yetu yene no kaatu kale twi inekela maantu yalwe.

Ombepo yokulonga noonkondo ndjika twa pewa oye tu longo oku ilongela oshindji tse yene. Shika ongaashi okuopaleka omihandjo dhetu, nosikola ayihe , okuhawaleka iikulya nokulonga momapya. Omolwokulonga nuudhiginini huka neitulemo lyetu Cuba okwa pititha aalongwantu aaNamibai oyendji miimpungulonga ya yooloka ngaashi uunamiti, uuinginia, uulongisikola, omahupilo nokuyalula uundjolowele wiinamwenyo uunamapya, okulonga iihape, okumuna oondjuhwa, okutseya omakuti noku gamena, okutoola oonkundana nuunongo wopakwiita.

Sho USSR a teka po nekuma lyaBerlin Wall lya gu po , Cuba okwa li muupyakadhi pamahupilo na tse wo otwa gumwa koshinima shika pamwe naantu yaKuba. Otashi vulika ngiika shika shali ompito ndjoka Fidel kwali ta vulu okutu etha opo a kwathele ashike aantu ye, ndele ye ine tu ekelahi okwa topola kehe shimwe na tse noku soshimpwiyu kutyya otwa manitha eilongo lyetu moRepublica yaCuba.

Pethimbo Namibia a taagulukile kemanguluko, aanasikola oyendji oyali ya falwa koNamibia okuza kiilongo niilongo ye endithwa kIigwana Hangano, mwaambaka omwa kwatelwa wo naamboka ya li ko Kuba. Aailongi oya shunithilwe koNamibia opo ya ka kuthe ombinga momahogololo. Oyendji yomaanasikola mboka ya zi kiilongo yilwe inaya ka pitikwa ya shune okumanitha omailongo gawo, ndele tse atuhe twa zile ko Kuba otwa shunine keilongo lyetu noku li manitha, shika otwe shi pandulile epangelo naantu ya Cuba mewiliko lyonawa lya Fidel Castro Ruz. Otandi longitha ompito ndjika pehala lya ndje mwene nolyaalongwa ooyakwetu naaholimbili yaNamibia ayehe oku ulika euvonayi lyetu kombinga yomipoppyo tadhi popiwa koohandimwe noshowo kiikundaneki mbyoka tayi kambadhala okugandja uuyelele waali mondjila kondjokonona yaCuba. Omapopyo ga tya ngaaka omawinayi notaga uvitha nayi na otage tu piyaganeke, tse mboka tu shi shoka aantu ya Kuba mewiliko lyaFidel Castro Ruz yetu ningile oshowo, shoka ya ningile emanguluko lyoshilongo shoomeme.

Ekondjo lyaComandante Fidel, molwuuthemba waantu mboka ya li ya thiminikwa inali pilikwa nando. Otashi vulika taya tsikile noku taandeleka iifundja yawo moNamibia na palwe kombinga ya Cuba naCastro, sho tse mboka tu shi shi kaatu ko we. Ihe tse otwi itaala kutya aaNamibia oye na owino wondjokonona nkene Cuba naantu ye ya kwatha opo tu mone emanguluko ndyoka yo taya tyapula nena.

Nakusa omuholike Fidel Castro okwa gandja oshindji omolwemanguluko lya Namibia, na otuna okuzimina kutya ando kakwali ekwatho lyaakwiita yopaigwana yaCuba ando otashi vulika natango tuli muukoloni wepangelo lyokatongotongo sigo onena. Uuthiga we otawu kala na tse na otatu kala aluhe nongunga yaantu yaCuba. Fidel Castro ina sa nondjokonona ye otayi kala aluhe mu tse.Ngoye ku po putse palutu ndele ondjokonona yoye otayi kala natse aluhe. Oshoka owa thiga po oshigwana sha Namibia sha pandula noonkondo.
Omasiku 25 Novemba esiku lyotango okudhimbulukwa eso lya Fidel Castro, omunandjungu melunduluko moCuba, ngoka a manene oondjenda dhe mo 2016 mepipi lyomimvo 90. Okwa kala omuwiliki gwa Kuba uule womimvo 52. Oshinyolwa shika osha kuthwa moshipopiwa sha leshelwe kOmukonakoni Ndjayi gwopolisi ya Namibia Leitenanda Ndjayi Sebastian Ndeitunga pethimbo lyoshituthidhimbulutho sha Nakusa Castro mo 2016.

LEAVE A REPLY

Please enter your comment!
Please enter your name here