Omuhandjo wovamati wa pya

0
197

Komutoolinghundana

OKONGO-Opolifi yoshitukulwa shahangwena otai konaakona epyo lombinga yomuhandjo woumati mosekundofikola Oshela moKongo moshitukulwa shaHangwena. Ehokololo ola kolekwa komupopiliko wopolifi moshitukulwa shaHangwena sisante Kaume Itumba kutya omundilo owa xwama Noveba 20, 2017 pokati kotundi 15:00- 16:00.

Sisande Itumba ta yelifa kutya omundilo wa tameka monduda youmati molwa okaradio ka xweyululwa eengodi mu na emanya, neengodi tadi kwatakanifwa kumwe neengodi dolusheno mekuma oka fiwa taka yadekwa omundilo. Ehokololo eli ola kolekwa yoo nokumukulunhu womihandjo mOshela Philip Ndeshikeva kutya omundilo owa tameka monduda yeembete 12 nomatalashe noikumbafa noilongifo aishe younona oya pila mo. Ta weda po kutya ebloka keshe oli na eenduda hetatu mwa tulwa eembete 12, epye poo la eta omwaka munene kombinga younona oumati 96 ve na kukongelwa apa tava nangala 2018.

Ndeshikeva ta yelifa kutya paife ove va nangeka pakafimbo komuhandjo wovamati vondodo 12 ve li mefudo. Okwa ti, Oshela oyo osekundofikola yotete ya tungwa kombinga oko pefimbo lekondjelomanguluko, omwa longwa vahapu vokombinga oko omanga vamwe va li hava ka konga eefikola koitukulwa ili li fiyo okoKavango molwa ofina, ofikola oya eta ehongo popepi noshiwana.

Ehokololo eli, yoo ola kolekwa nokomukulunhufikola wopakafimbo Eunike Ndahafa Shinyongo kutya epyo lombinga yomuhandjo wofikola ya totwa po 1982, ola weda komhumbwe yeenhele dokunangeka ounona mofikola yovahongwa ve dule 800 va dja koitukulwa ya yooloka moNamibia. Sha etifa elelo li tule eembete 12 monduda imwe. Nande elelo lofikola la tula po eemhango momuhandjo muha etwe nomuha longifwe oilongifo ya nyika oshiponga kolusheno noikwamakwatafano, eshi inashi ya moshipala ovanafikola ve likufile oveta meenyala ngaashi oshiponga sha holoka pamupya. Onghee omukulunhufikola pamhito ei mOshela okwa pula omuNamibia a kwafele ofikola 2018 opo ehongo li dule kutwikila. Shinyongo ota ti, mOshela omu na eengudu okudja pondodo 8 fiyo 12,oyo i li koxulo yoshitukulwa shaHangwena komuhandjo woukadona ohaku nangekwa 192, noumati 192. Ta weda po kutya, nande opolifi tai twikile nekonaakono kutalike apa pe fike enyonauko, oupyakadi ove na ku u fikifa kombelewa yoshitukulwa, nebloka la pya po olimwe lomabloka a wedwa komuhandjo eshi wa wedelwa eshi oshilongo opo sha manguluka. Ovadali vovanafikola ova shiivifilwa oshiponga nota pandula aveshe va yambidida medimo lomundilo ou, ta pandula kutya shalongo onhala yetungo ya ningwa moipeleki shaashi omeva okwa li taa ende kanini, ngeno hasho ngeno oushada ounene.

LEAVE A REPLY

Please enter your comment!
Please enter your name here